Charter Document - 02220306

Je Adeline fame çay en arrier Hugon chestelain de Chalamont et nous Willaz Perriauz et Wachiers fil de ladite Adeline et doudit chestelain façons savoir à ces qui verront ces lettres que nos quitons eschangons baillons et vendons à noble baron Jeham conte de Bourgoigne et signour de Salins nostre fort maison de La Riviere et les appertenances et quelque droit que nos tenesiens oudit leu doudit conte liquel fort maison et lesquex choses devantdites nos teniens en fyé de luy et ces dues choses li baillons pour doux quartiers de chadiere franc de son grant puys de Salins lesques nos devons tenir en fié de luy et lesquies bailli nous ha et assigné et por doux cenz livres d'estevenans lesquies nous havons eu et receu de luy en bons deniers nombrez Et est à savoir que nous promettons adit conte per nos soiremants doné sus saints evangiles que nous contre ledit eschange vendue et quittance ne venrons ne consentirons que autres y viegne à nostre pooir abrenunciant En tesmoint de laquel chose à nostre priere et à nostre requeste li chapitre de Saint Michiel et de Saint Morise de Salins ont mis lour seaux pendant en ces lettres Ce fut fait l'uictive des apostres saint Pierre et saint Poul l'an mil CC sesante et six