Charter Document - 02220305

Je dame Luque dame de Bonevens fait savoir à touz que dou loux et de la volunté et dou consentement exprès monsignour Henry signour de Jouz et monsignour Jehan signour de Chevres mes enfanz ay vendu baillié quité et delivré à touzjorsmais à noble baron monsignour Jehan de Chalon signour d'Arlay un mien champz assis ou finaige de La Reviere ou lue où l'on appele Roches entre le champs maistre Guillaume de Baume qui fut à Belegru d'une part et le champ Haymon Battaillart d'autre pour le pris de quarante livres et trois sol d'estevenanz baillié et delivré à moy en bons deniers nombrez par la main adit mastre Guillaume de Baume commandemant doudit Jehan et me sus devestue doudit champ et ledit Jehan en ay envesti et mis en possessien corporel ou assi et promet En tesmoint de laquel chose j'ay requis et fait metre en ces presentes lettres le seels de mesdiz enfanz c'est à savoir monsignour Henry et monsignour Jehan et nos lidiz Henry sires de Jouz et Jehans sires de Chevrel qui ladite vendue avons louée et loons et ratifions tant comme nos poons et à la proiere et à la requeste de dame Luque nostredite mere avons mis nostres seauls pendant en ces presentes lettres en tesmoint de verité Faites et donées l'an Nostre Signour corrant par mil CC et doux la veille de la nativité saint Jehan Baptiste