Charter Document - 02220301
| Charter Number: | 02220301 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Purchase |
| Date: | 1263 - 1264 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.650) |
Charter:
Je Perrin de Ceys escuiers fil çay en arrier mons Humbert doudit leu chevalier fais savoir à touz que j'ay vendu quité et baillié à la noble dame Lore contesse de Bourgoigne et dame de Salins et à ses hoirs permaignablemant tout le droit et toute la raison que je hay et puys avoir ou fié lequel messire Girars conestaubles de Bourgoigne doit tenir de moi quant à fié que li Puz de Livier doivent tenir doudit conestaubles et quant à fié que lidit conestauble tient de moy à Montagney et es appendises pour trente livres de bons estevenans lesquex je hay receu de ladite contesse en bons deniers nombrez Et ai vendu ceste chose et en tel maniere que se autres que la noble dame dame Alix contesse de Bourgoigne palatine ou sui hoir dissoit que je deusse tenir ledit fié de luy et trové fut par droit que je de celuy le deusse tenir je rendroie à ladite Lore ou à ses hoirs les devantdites trente livres et ceste vendue seroit nulle et seroit li affaires en tel estat comme il estoit devant la confection de ces lettres Et hay abrenoncié En tesmoignaige de laquel chose à ma priere et à ma requeste li religious hons Nicholaux abbes dou Mont Sainte Marie et li nobles bers Amey sires de Monfacon ont mis lour seaux en ces lettres Ce fut fait l'an de l'incarnation Nostre Signour qui corroit par mil CCLXIII ou moys d'avril