Charter Document - 02220300

Nous Perrins filz çay en arriers Hugue de Saint Agne et Ysabelet sa fame fille jadix à Thiebadet de Chays faisons savoir à touz que nous avons venduz bailliez et delivré perpetuelment sanz jemais rapeler à noble baron et puissant nostre redoté seignour mons Jehan de Chalon signour d'Allay et à ses hoirs et cui il l'outroiera la sexime partie non devise de un molin assis ou terretoire de Myon sus la reviere de Luson ensamble la sexime partie non devise dou fun doudit molin et dou cour de l'aigue dessouz et dessus liquelle sexime partie apartenoit à moy ladite Ysabelet pour raison de mon heritaige Et cesdites choses nous li avons vendu franchement pour le pris de seze livres de bone et leal monoie corsable sauz ce que elles estoient dou fiez doudit acheteour douquel fié quant adit molin soulement nous demorrons quitte lesqueles seze livres dessusdictes nous havons heu et recehu doudit achetour en bons deniers nombrez et nous en tenons pour bien paiez Desquex choses dessus nommées vendues à touzjours nous nous devestons et ledit messire Jeham achetour et ses hoirs en envestons et metons en possession corporel ou ansi per ces lettres Et cesdites choses vendues nous li devantdiz Perrins et Ysabelet mariz et fame vendons anduy ensemble et un chescun de nous por lui promettons En tesmoignaige de laquel chose nous li devantdiz Perrin et Ysabelet vendour requis avons et fait metre Guillemin Verguet clerc de Salins jurez de la court de Besençon en ces presentes lettres le seal de ladite court de Besençon Et nous officiaux avons fait mettre en ces presentes lettres le seal de nostre court de Besençon en tesmoing de verité Ce fut fait et doné en l'an Nostre Seignour corrant par mil CCC et cinc le vanredi après feste saint André