Charter Document - 02220297

Je Blanchon fille çay en arriers Perrin à Maire de L'Abergement fais savoir à touz que je dou loux et dou consentement Vienet mon mari ay vendu et vende baille et delivre à touzjours mais senz nul rapel à noble baron et puissant mon très chier et redoté seignour Jehan de Chalon seignour d'Allay et es suens ou cui il l'outroieroit une moie piece de terre assise en conbe Ronde touchant d'une part à la combe à Maux et d'autre part à la terre qui fut Hugue à Clert que lidiz messires tient laquel piece de terre je li ay vendue por le pris de nuef livres de bone monoie corsable en l'arceveschiez de Besençon lesquex je ay heues et receues en bons deniers bien nombrez et m'en tien pour bien paiée De laquel piece de terre je me devist moy et les miens et ledit mons en envist luy et les siens ou cui il l'outroieroit et met en possession corporel ou ansi par la tradicion de cex lettres prometanz En tesmoignaige de verité nous avons requis et fait metre le seal de honorable chapitre de Saint Anatoile de Salins en ces presentes lettres Faites et données l'an de Nostre Seignour corrant par mil CCC et quatre ou mois de may