Charter Document - 02220296

Je Hugonin dou Champbanot damoiseax de Salins fais savoir à touz que je non contrainz ne deceu mais de ma bone volunté et por mon profit ay vendu quitté outroié et delivré à touzjours à honorable baron et saige monsignour Jehan de Chalon signour d'Allay et es suens ces choses s'ensuegnent c'est à savoir les enfanz Vuillemin à Contrait d'Eschay et lour mex liquex est assis ou territoire d'Eschay item en la vile de Nan un chanp que siet de lez le biez de Vax touchanz à la terre es enfanz à Tempeste d'une part et à la terre dou Quartier d'autre item une piece de terre en champ de Moine touchant à la terre es enfanz à Tempeste item un cham que siet derriers la vile de Nan lequel on appele le champ de la Fontaine touchant à la terre es enfanz à Tempeste item un champ que l'on apele le champ de la Saye touchant à la terre es enfanz à Tempeste item une piece de prez que siet ou pendant de Val devers Saint Agne touchant à la terre es enfanz à Tempeste item le quart dou pré que l'on appele le pré Fondet touchant à la terre es enfanz à Tempeste item la moitié de la terre dou Quartier que siet delez le biez de Vax corrant entre ladite terre et le champ de Moinne item tel droit que j'ay ou leu que on dit ou quartier de la Coste Chaude c'est à savoir le quart item ausi le quart de la terre gaignable qui siet ou leu que l'on dit ou quartié de Vamorant et touche à la terre es enfanz à Tempestez par ensi com je en ay heu usez item le chesal où siet la maison Guyot à fil à Lespailliez de Nan item le cultiz que siet derriers la maison à Bolomier de Nan touchant à la terre es enfanz à Tempeste lesquex choses dessusdictes sunt assises ou territoire de Nan et d'Eschay et est estimé ceste terre de Nan à vinz et cinc jornaux de terre Et toutes cex choses dessusdites j'ay donées à mons Jehan seignour d'Allay pour cenz et dix livres de monoie corsable en l'arceveschié de Besençon laquel somme de pecune je devantdiz Hugues ay heue et recehue dou devantdit monsignour Jehan en bon deniers nombrez et m'en tien pour bien paiez Et pour ce je devant diz Hugues me suis devesti des devantdites choses pour moy et pour les miens et le devantdit mons Jeham en ay envesti pour luy et pour les siens et mis en corporel possession ou ansi En tesmoignaige de ceste chose je devantdiz Hugues ay requis et fait metre en ces presentes lettres le seal de honorable chapitre de Saint Anathoile de Salins Faites et donées en l'an de l'incarnation Nostre Seignour corrant mil CCC et trois ou mois d'avril