Charter Document - 02220295

Nous Girars sires d'Arguel chevaliers fiz çay en arriers mons Pierre seignour d'Arguel façons savoir à touz que nous non mie decehu contrainz ne losengié mais en nostre saine memoire establiz de nostre propre volunté et liberalité donons outroions et baillons avons doney outroié et baillié en fié et en chasement à noble home et saige monsignour Jehan de Chalon signour d'Allay et à ses hoirs nostre chesteal d'Arguel et la tour et le dongon et le bourc et nous en sumes devesti et ledit mons Jehan en avons envesti et mis en possession corporel par la tradicion desdiz leus et des clés d'yceus leux lediz Jehan et nous presenz esdiz leux Et lidiz Jehans en est entrez en nostre homaige de main et de bouche en la presence de religiouse persone Guillaume à ce temps abbé de Balerne mons Amey de Montaguz seignour de lois mons Girart de Vuillaffens prevost et chanoine de Saint Anathoile de Salins mons Othe et mons Jehan Pignet chanoines de cel meisme leu et monsignour Hugon diz Pomelez chanoines de Saint Morise de Salins Et toutes ces choses dessusdites nous avons bailliés et delivrés adit Jehan de Chalon par ensi come il est dessus dit et devisez senz riens retenir à nous fors que le fié desdites choses tant seulement Et nous lidiz Girars cognossons et prometons par nostre soirement doné sus sains ewangiles corporelement que nous ne avons fait ne farons chose pour quoy ceste donacion n'ait fermeté perpetuel En tesmoignaige de laquel chose nous lidiz Girars d'Arguel avons mis nostre seal pendant en ces presentes lettres et avons proié et requis saiges et discretes persones le prevost et le chapitre de Saint Anathoile et de Saint Morise de Salins que il y metent lour seaux avez le nostre Donné l'an de l'incarnation Nostre Seignour corrant par mil CCC et cinc le mardi devant la saint Urbain ou mois de may