Charter Document - 02220294

Nous Jehans de Chalon sires d'Allay viccuens et maires de Besençon d'une part et nous li cytians et commons de la cité de Besençon d'autre part fais[ons] savoir à touz que nous lidiz Jehams pour le bon et segur estat de nous et de nostre terre et nous li citiens et communs pour le segur estat de nous [et] de la citey de Besençon et pour bien de paux et de amitié havons faite entre nous les covenances et aliances cy après escriptes c'est à savoir que nous lidiz Jehans selonc les manieres et condiccions ci après devisées prenenons et havons pris por sexante années continuelment ensigant à temps de la confection de cex lettres començant en nostre salvegarde et conduit touz les citiens de Besençon ensamble et chescun por luy touz lour biens et la cité toute ensamble lour bones costumes et franchises droiz façant par nous ou par nostre comandement dedenz la citey de Besençon ou dedenz les boynes où lidiz citiens ont acostumez de plaidoier c'est à savoir à pontet de la malaidiere d'Arc à la fontaine de Richebourc à Saint Ferguel à la croiz Agarre ou à Pallante Et se acuns desdiz citiens estoient pris ou restey en cors ou en avoir ou en acuns de lour biens nous sumes tenuz de requerir à noz propres despens la delivrance de lour biens et de lour et se la persone qui les tanroit ne les voloit delivrer nous prometons et sumes tenuz de faire plait droit façant et guerre avez lesdiz citiens à lour requeste et à noz propres despens saul que contre cex esquelx nous sumes tenuz pour raison d'omaige c'est à savoir le roy de France le roy d'Alemaigne le conte de Bourgoigne la contesse de Bourgoigne por raison de doaire l'arcevesque et le siege de Besençon l'abbey de Saint Oyant de Jour le duc de Burgoigne et le conte de Champaigne noz homes tant come il voudront prendre et faire droit et le seignour de Monfacon contre lequel nous ne devons mie aidier lidiz citiens Et est à savoir que quant nous à la requeste desdiz cytiens fariens pour lour plait et guerre il y doivent estre à lour propres despens Et prometons esdiz citiens que nous les saverons et garderons par toute nostre terre droiz façant et soignerons vendaiges toutes les foiz que mestier leur sera à guerre et senz guerre en bone foy Et nous lidiz citiens promettons et sumes tenuz de faire droit à chescun qui riens nous voura demander par ledit mons Jehan par celuy de ses hoirs qui ceste aliance aura ou par lour comandement dedenz la citey de Besençon ou dedenz les boines dessusdites par l'espace desdiz sexante anz et dois anqui en avant per tant con ses justises l'aporteront Et nous lidiz Jehans prometons esdiz citiens que toutes foiz que il saudront avez nous nostres hoirs successivement qui ceste aliance aura ou avec noz genz à armes fuers de la citey de Besençon pour nostre besoigne ou pour la lour nous sumes tenuz de ramener lour et lour biens dedenz lour citey loialment et en bone foy et à nostre pooir par nous nostre hoir qui ceste aliance aura ou noz genz Et nous lidiz citiens prometons et sumes tenuz de recepter dedenz nostre citey ledit terme durant ledit mons Jehan celui de ses hoirs qui haura ceste aliance ou lour certain comandement à cenz homes d'armes à lour propre despens toutes foiz que mestier lour sera pour nos bessoignes ou pour les lour propres et faire vendaige à lour et à lour genz Encor sumes tenuz de faire aide adit monsignour Jehan à celui de ses hoirs successivement que ceste aliance aura pour lour propres besoignes ou por les nostres autrement non à grant force et à petite à noz propres despens par un mois de chescun an doudit terme continuelment ou par parties à lour requeste saul ce que nostredite citey demoroit garnie suffisaument de genz et de tel aide come nous lour feriens en bone foy toutes noz bannieres de Besençon saillies lidiz Jehans cil de ses hoir qui ceste aliance aura ou lour certain comandement s'en devront tenir pour paiez Et se lidiz messires Jehans ou cil de ses hoirs qui ceste alliance aura havoient mestier de nostre aide par doux autres mois de chescun anz outre le dessusdiz mois nous sumes tenuz par doux autres mois de chescun anz continuel ou per parties à lour volontey de lour aidier à lour propres despens suffisaument saul ce que il ne nous poent mander ou mois de vendenges ne ou mois de moissons et devons movoir dedenz quinze jours après ce que nous en seriens requis et ne sumes tenuz d'aler en ost ne en chevachié se n'est avez le cors doudit monsignour Jeham de l'um de ses enfanz ou de chestelain bannelet de lour lignaige se lidiz Jehans ou sui enfanz avoient loial assoynne et li essonne demuere en lour bone foy par lour dit ou par lour mandement Et ceste aide nous lour devons faire dois lour chastel de Jour tanque à la Sonne et dois Mombeliart tanque à Loons le Saunier Et ces convenances nous prometons tenir et garder adit monsignour Jehan et à celuy de ses hoirs qui ceste alliance aura le terme dessusdiz durant et que nous ne ferons pax que lidiz messires Jehanz cil de ses hoir qui ceste alliance aura et lour genz ne soient contenuz en la pax Et nous lidiz Jehanz aussi pour nous et pour nostre hoir qui ceste aliance aura prometons que nous ne ferons pax que lidiz citiains ne soient contenuz dedenz la pax des choses apartenanz à ceste aliance Et ces covenances nous lidiz Jehans pour nous et pour celuy de noz hoirs qui ceste aliance aura successivement prometons tenir et garder esdiz citiens en bone foy senz fraude senz engin et senz barat et par nostre soirement et sus la poinne de trois cenz marz d'argent sollempnelment stipulée desdiz citiens senz venir encontre durant ledit terme Et nous lidiz citiens prometons aussi audit mons Jeham et à celui de ses hoirs desçandanz de son cors qui ceste aliance aura lesdites covenances tenir et garder fermement par l'espace desdiz sexante anz par noz soirement et sus la poinne de six cenz marz d'argent sollempnelment stipulée doudit Jehan à paier de l'une partie à l'autre tantes foiz et toutes foiz que li une partie ou li autre vendroit encontre ces covenances en tout ou en partie à la vie de nous Jehans dessusdiz tant soulement et après le decex de nous diz Jehan nous les parties dessusdites volons et outroions que lesdites poinnes ne soient ne ne puissent estre commises fuers que une foiz par chescune des années dessusdites se nous les parties dessusdites defailliens des convenances dessusdites ou de acun[e] d'ycelles ce que Dex ne vuille laquel poinne commise ou non commise paié ou non paié de l'une partie ou de l'autre une foiz ou plusours foiz les dessusdites covenances et aliances demuerent et doivent touzjors demorer en lour vertuz fermes et stables lesdiz sexante anz durant Et est à savoir que cil de noz hoirs descendanz de nostre cors de nos diz Jehan de Chalon qui sera nostre hoir d'Allay de la viccontey [et] de la mayerie de Besençon et de ce que nous havons ou hauriens à Arguel doit avoir et haura la aliance dessusdite après nostre decex des années qui faudroient à acomplir desdiz sexante anz que à nostre temps ne saroient corrues et de ce que nous havons ou hauriens à Arguel par nostre fait ne nous poons deffaire ne ordener à autre de noz hoirs fuer que à celuy qui seroit nostre hoirs d'Allay de la viccontey et de la mayerie de Besençon Et lesdiz sexante anz passez et feniz nous lidiz citiens de Besençon sumes tenuz de recepter à touzjoursmais celuy des hoirs doudiz mons Jehan qui sera ses hoirs successivement d'Allay de la viccontey et de la maierie de Besençon et de Arguel si con dessus est dit et ses genz dedenz la citey de Besençon à cinquante homes d'armes à cheval à lour propres despens autremant non toutes fois que mestier lour sera et lour devons soignier vendaiges et garder lour de force droit façant par l'arcevesque de Besençon Et se par raison dou recept desdiz cinquante homes d'armes lidiz citiens sustenoient domaiges ou avoient guerre cil qui hauroit ledit recept doit premierement jurer la foy à cel de la citey et aidier et conseillier de tout son pooir lesdiz citiens de Besençon à siens propres et n'en doit faire pax senz lesdiz cytiens et de ce faire lettres esdiz citiens et lidiz citiens faire lettres à luy aussi et ensi ensugant toutes foiz que li hoirs se changeront Et ces covenances nous lidiz citiens devons tenir et garder adit mons Jehan et à celui de ses hoirs qui haura ceste aliance save la feautey l'emperaour et la feualtey que nous avons faite à très excellanz prince à Albert par la grace de Deu roys des Romains come administrour de l'Empire à sa vie tant soulement et salve la feaulté nostre pere en Jesus Crist l'arcevesque et le siege de Besençon et saves les covenances que nous havons à très haute dame Mahaut contesse d'Arthois et de Bourgoigne palatine et dame de Salins et à Robert son fil lesquex fineront l'an de grace corrant per mil CCC dix et nuef ou mois de janvier Encor prometons nous lidiz Jehans esdiz citiens que se nous les requeriens à armes et il estoient ou devoient aler en la chevachié de ladite contesse ou de Robert son fil dessusdit ou de lour comandemant nous ne les porriens mander en celuy temps que il seroient mandey ou seroient [en] la chevachié de ladite contesse ou doudit Robert jusque il fussent retornez à Besençon ou contremandez durant ledit terme des aliances de ladite contesse et Robert son fil d'une part et desdiz citiens d'autre laquel aliance nous pour raison de nostre juridicion de Besençon avons touzjours contredite et encor la contredisons et protestons que elle ne vaille et que nostre droiz nous en soit saux Encor est à savoir que se ladite contesse ou Robers ses fil venoient à Besençon à genz d'armes durant le terme dessusdit entre lours nous dit citiens nous ne sumes tenuz de recepter ledit monsignour Jehan ses hoirs ne lour genz à armes tant come li contesse dessusdite ou Robers ses fiz ou lour genz d'armes seroient à Besençon c'est à savoir dois sexante homes d'armes à cheval tantque à cenz que fussent de defuers de la citey de Besençon mais toutevoie en tout temps de jour les genz doudit monsignour Jehan de ses hoirs ou de lour comandemant puent entrer senz armes dedenz Besençon et issir Et se lidiz messire Jehans sui hoirs ou lour comandement achetoient acunes viandes dedenz Besançon il les puent traire fuers de la citey senz contredit et nous lour devons soffrir à vendre en bone foy fuers que ou temps que nous seriens en guerre senz lour et encor ou temps que nous seriens en guerre pour lour ou pour nos nous lour devons laissier acheter viandes avenamment et traire fuers de Besençon mais que ce ne soit ou griez domaige de nous et de la citey et les devons garder de force droit façant par l'arcevesque de Besençon Encor est à savoir que nous lidiz citiens et commune povons ne devons faire nules autres alliances à persone quelle soit lesdiz sexante anz durant se n'estoit dou consentement et voluntey doudit Jehan ou de celuy de ses hoirs qui ceste alliance hauroit successivement et prometons adit monsignour Jehan et es suens loialment et en bone foy lour persones garder lour droiz lour genz lour comandement et lour justises de Besençon tant come il voudroient faire droit par l'arcevesque de Besençon Encor est à savoir que cil des hoirs doudit Jehams descendanz de son cors qui sera ses hoirs d'Allay de la viccontey [et] de la maierie de Besençon et d'Arguel si com dessus est dit pour raison doudit terme qui sera à venir desdiz sexante anz doit jurer la foyaltey de la citey de Besençon et baillier lettres de cex covenances esdiz citiens et lidiz citiens à luy et ensi ensugant toutes foiz que li hoirs se changeront durant ledit terme Encor est à savoir que nous lidiz Jehans ne noz hoirs dessusdiz ne sumes tenuz de faire plait ne guerre des choses que lidiz citiens hauroient à faire par devant les maistres des foires de Champaigne dou fait desdites foires mais nous en prometons aidier et conseillier lesdiz citiens en bone foy Et renunçons nous lesdites parties en cest fait à toutes excepcions lesions defensions et raisons de fait et de droit escript et non escript à l'excepcion de fraude et de baret à touz statuz à toutes costumes et especialment à ce que nos haiens fait lesdites covenances par cohercion ou par paour item à ce que nous puissiens demander libelle procex ou voye de droit de cest presenz instrumenz item à toutes excepcions et circonvencions à toutes manieres de restitucion à touz previleges empitrez et à empetrer à toutes aides conforz et benefices por lesquex les dessusdites covenances et alliances porroient estre cassées anullées ou amoindries en tout ou en partie et especialment au droit reprovant la general renunciacion Et pour toutes les alliances et covenances dessusdites et chescune d'ycelles tenir et garder fermement nous lidiz Jehans obligons esdiz citiens et commun nous noz hoirs qui ceste alliance successivement hauront et touz nos biens muebles et non muebles presenz et à venir Et nous lidiz citiens et communs obligons ausi audit mons Jehan et à sesdiz hoirs nous noz successours noz hoirs les biens dou communs et des singulieres persones de Besençon quelque part que il soient pour tenir atendre et acomplir toutes les choses dessusdites et chescune par soi Et volons et outroions li une partie à l'autre que honorable et discrete persone li officials de la court de Besençon qui pour le temps sera à la juridiccion douquel quant à ce nous nous submetons nous puisse controindre par sentence d'escomeniement et de entredit nous lidiz Jehanz et nozdiz hoirs par excomuniement en noz persones et d'entredit en nostre terre et nous lesdiz citiens par excomuniement des persones singulieres des presenz et des successours et d'entredit en la citey de Besençon toutes les foiz que nous vendriens ou feriens contre les choses dessusdites en tout ou em partie Et toutes les choses dessusdites nous lesdites parties prometons par nosdiz soirement et sus les poinnes dessusdites tenir et garder fermement senz venir encontre ne consentir que autres y viegne En tesmoignaige desquex choses dessusdites et de une chescune d'ycelles nous les parties dessusdites pour nous pour noz hoirs et pour noz successours si con dessus est dit avons fait soignier et subcrire cest presenz instrument par la main Garin public notaire cy après nummez et son signel acustumey per nostre priere et nostre requeste et i havons prié et fait à metre les seaux de la court l'official de Besençon et de la court l'official de l'arcidiacre de Besençon Et nous lidiz Jehans y havons mis nostre seal et nous lidiz citiens le seal de la communaltey de Besençon en la presence desquex officiaux et Garin public notaire ensemble les tesmoings cy après escript noux lidiz Jehans pour nous et pour nos hoirs dessusdiz à Erguel où nos estiens et nous lidiz citiens et communs pour ce assamblé à Besençon à Saint Pierre universament cloche sonée à houre de prime havons de bon propos et de certaine science fait louey acordey et promis toutes les choses dessusdites et chescune d'ycelles per sollempnel stipulacion faite es officiaux et à Garein dessusdit comme à publiques persones recevanz lesdites stipulacions en nom de l'une et de l'autre desdites parties et pour lour et de ces cui il apartient apartanra ou porra apartenir Ce fut fait accordey louey promis et jurey de nous Jehan de Chalon dessusdit pour nous et pour noz hoirs si con dessus est dit en la presence des officiaux et Garin public notaire dessusdiz et des tesmoins cy après escript en nostre chestel à Arguel l'an de l'incarnation Nostre Seignour corrant per mil CCC et sept la seyste indicion le vint et novieme jour dou mois de janvier c'est à savoir le jour des huictaves de la feste saint Vincent ou tier anz de la pontificacion nostre saint pere Clement paupe quint en la presence de religieuses persones et honestes don Guillaume par la pacience de Deu abbey dou Mont Sainte Marie Nicholaux abbey de Belevax Bertrant abbey de Buyllon de la dyocese de Besençon et Hue abbey de Tulley de la dyocese de Lengres de l'ordre de Cyteaux frere Pierre de Gy moinne et celerier de Belevaux Jaique de Lengres moinne de Tulley et Estene d'Assenges moigne de Bullon et honorable home et discret monseignour Amey de Montaguz seignour de loys Hugonin de La Roche Estevenin Dou Marchié et Perrenet de Pontaillié notaire de la court de Besençon Berthelomet Varin de Besençon Hugonin de Blaterens Odet dou Chestelnuef clers Hombert Amariz cytiens de Besençon et de plusours autres bones genz tesmoings à ce apelez et requis Item furent aussi faites louées et acordées promises et jurées lesdites covenances et alliances de nos diz citiens et commun et de chescune singulere persone de nous en la forme et en la maniere dessusdites les mains des singuleres persones tendues et levées à saint ewangile à Besençon à Saint Pere le peneultime jour du mois de janvier dessusdit l'an l'indicion la pontificacion l'oure et presenz touz les tesmoins dessusdiz et pluseurs autres à ce apelez et requis Et nous li officiaux dessusdiz qui havons estey à toutes les covenances et alliances dessusdites et havons recehu avec loudit Garin la stipulacion et les soiremanz des parties dessusdites si con dessus est devisey et contenuz come publiques persones havons mis à lour requeste les seaux desdites cours avec les seaux desdiz mons Jehan et citiens et commun et le seignel doudit Garin en tesmoignaige de verité Et je Garins []