Charter Document - 02220293
| Charter Number: | 02220293 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Acknowledgment |
| Date: | 1315 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p609) |
Charter:
Nous Jehans de Chalon fiz jadix de noble baron monsignour Jehan de Chalon signour d'Allay dont Dex ait l'arme faisons savoir à touz que nous avons repris et repregnons en fié ligement de nostre très chier signour et frere monsignour Hugue signour d'Allay le chestel de Lile souz Montreal la ville les finaiges et les appendises d'icelles à nous assignées pour noz partaiges à nostre vie segon ce que en les lettres faites desdiz partaiges se contient [et] confessons et recoignessons audit nostre frere que nous lesdites choses tenons et devons tenir en fié ligement doudit nostre frere et de ses hoirs et sumes entrez en son homaige et en sa foi en tout et por tout segon la forme desdiz partaiges et ensi lidiz nostres freres nous a receu de main et de bouche laquel foy nous li promettons et jurons et avons promis et juré par nostre seirement doné corporelment sus sains evangiles tenir et garder à touzjours mais senz corrompre Et de rechief confessons et prometons au devantdit nostre frere et par nostredit seiremant que nous repanrons de luy en fié le chesteal la ville et toutes les apartenances et appendises de Viteaux en la forme et en la maniere que nous avons repris toutes les choses de Lile dessus continue et devisée En tesmoignaige et en fermeté desquex choses nous avons mis nostre propre seal en cestes lettres faites et donées l'an Nostre Signour corrant par mil CCC et quinze le mardi après saint André l'apostre