Charter Document - 02220292

Je Girars de Vuaites escuiers fiz çay en arriers mons Pierre de Vaites fays savoir à touz que come nobles bers messires Jehans de Chalon sires d'Allay mes amez sires par la grace et par la liberalité et en reguierdenant à moi mes servises m'ait doné et à mes hoirs descendant de mon cors de ma fame esposée tant seulement en heritaige en fiez et en homaige tout quanque il avoit pooit avoir et devoit es villes es parrochaiges et en terretoire de Cheonville et de Loreville et en toute la chestellenie de Commerci soit en homes tailles censes corvées justices grant et petites fames molins bois aigues decourt d'aigues prés cham et toutes autres choses coment que elles puissent estre nommées et appellés et ait encore voluz et outroiez lidiz messire que se ansi estoit que je morisse senz avoir leal heir de mon cors et de ma fame esposée et Jehans mes freres soureviquoit après moy que il et sui hoirs de son cors descendant de sa fame esposée tant soulement aient et tiegnent les choses dessusdites en la maniere que il l'a doné à moy et à mes hoirs s'est entendre que se nous moriens andui senz hoir avoir de noz cors de nos femmes esposées les choses dessusdites toutes ensamble et chescune por soy doivent retorner au devantdit monsignour et es siens et les nostres revanroient ausi à noz hoirs en la maniere que nous les tigniens ou lidiz messire ou sui hoirs asseteroient à nouz heirs en leu de ce vint livrées de terre de monée corsable en l'arceveschié de Besençon à Salins sur ses rentes ou autre part en leu soffisant et les tanront nostres heirs en fey de mondit signour ou de ses hoirs come nous en teniens les choses de La Reviere je pour raison des choses dessusdites et pour ce que j'ai vehu por ceu la grant liberalité de mondit signour et le bon cuer qu'il a à moi ai doné et done par donacion faite entre les viz por moi et por Jehan de Vaites mon frere et por noz hoirs à mon devantdit signour et à ses hoirs en heritaige à touzjours mais tout quanque je et mesdiz freres Jehans de Vaites haviens poiens et deviens avoir senz ren retenir à nos ne à noz hoirs es villes de La Reviere de Dompierre à Chouvet ou perrochaige et en la chastellenie et ou terretoire d'ycelles soit en homes tailles censes corvées fours molins bois prel et champs et en toutes autres choses coment que eles puissent estre nommez et apellées lesquex choses nous teniens en fié de luy Et de cex choses je me suis desveti por moi et por mondit frere et nos hers et mon devantdit signour pour lui et ses hoirs en ai investi par la tradicion de cex lettres et mis en possession corporel ou ansi Et est encores à savoir et reconois je lidiz Girars pour moi et pour mon frere que j'ai repris et doi tenir en fié et en homaige de mon devantdit seignour et de ses hoirs toutes les choses que il m'a donées per ansi come elles sunt cy desus escriptes et devisées et en suis devenuz ses hons devant touz homes et fames qui puissent vivre et morir save la feauté monsignour de cui l'on tanra Vaites se ansi estoit que je ou mui hoirs ne fuissiens signours en tout ou en partie et save la feauté dou signour de Monfacon et ai promis En tesmoignaige desquex choses toutes et chescune par soi je lidiz Girars ai mis mon seal pendant en cex presentes lettres et ai proié et requis mon amé signour et uncle mons Jeham d'Oyseler signour de Flagey que il y mete son seel ensamble le mien en tesmoignage de verité Faites et donées l'an corrant par mil CCC et trois ou mois de fevrier