Charter Document - 02220290
| Charter Number: | 02220290 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1291 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.597) |
Charter:
Nous officiaux de la court de Besençon faisons savoir que Guillemins escuiers fiz mons Amey de Bossieres chevaliers confesse et publiement recognoit que il a repris en fié de noble baron monsignour Jehan de Chalon signour d'Allay son bien amé signour pour bienfait que fait li a lidiz messire Jehans et es siens et especialment pour un don de vint livres d'estevenans lesquex lidiz Guillemins a confessé que il a eues et receues doudit monsignour Jehan en bons deniers nombré c'est à savoir un prel ouquel lidi escuiers a affermé que il a huit faux de pré et siet ou territoire de Bossieres ou leu que l'on dit pré de Vey et le siege dou molin qui siet oudit pré item un home que lidiz escuiers a à Bossieres c'est à savoir Guillemin le fiz Gaillet ensanble les mès que lidiz hons tient le fon et les apendises de celui mès et de celui qui le tanroit ou temps à venir En tesmoignaige de laquel chose nous avons mis le seal de la court de Besençon en cex presentes lettres faites et donées le londi après la saint Andrey l'an corrant par mil doux cenz quatre vinz et onze