Charter Document - 02220288

Je Girars escuiers de Fraigne fiz monsignour Hombert chevalier de Fraigne fais savoir à touz que je tieng et doi tenir en fié de honorable home mon très chier signour Hugon de Chalon chenoine de Lyon trois maignies de homes en la vile de Fraigne c'est à savoir Perrenier le Fol et Haymonet son fil de Fraigne et Crestin le fil Taluchet ensamble touz lour amaisement lesquex trois maignies de homes je obligoy engagoy et delivroy en la main audit Hugon mon signour come son fié pour quarante souz d'estevenens bons et loiaux que je ai eu et receu doudit Hugue en bon deniers nombré Et wil et comant et outroie que lidiz Hugues mes sires ait preigne et reçoive desdites trois maignies d'omes durant ladite gagiere touz les profit et toutes les joiances que je en avoie et devoie avoir se je les tenoie saul ce que lidiz Hugues n'i puet faire prise et lidiz Hugues me quite et a quité durant ladicte gaigiere dou servise en que je li estoie tenuz pour raison dou fié desusdit Et je lidiz Girars renonçois En tesmoignaige de laquel chose je lidiz Girars ai fait metre en cex presentes lettres le seel de religious home frere Jaique abbé dou Mont Sainte Marie de l'ordre de Citeal et de la dyocese de Besançon ensamble le seel mons Huon curé de La Reviere Faites et données en l'an Nostre Signour qui corroit par mil doux cent octante et nuef ou mois de juenier