Charter Document - 02220287

Je Girars escuiers de Fraigne fiz çay en arriers monsignour Hombert de Fraigne chevaliers fay savoir à touz que je en nom de moy et de mes successours reprent et ai repris et reçoi et ai receu en fey de honorable home et mon très chiers signour Hugue de Chalon chenoine de Lyon doues maignies d'omes ensamble tout lour amaisement que je ai en la ville de Fraigne c'est à savoir Hombert le fiz Vuillame et Vauchier le Mareglier lesquex homes et tout lour amaisement je tenoie devant ce come mon franc aluef et coignois per cex presentes lettres que li devantdiz Hugues mes très chiers sires m'a bailliez et paiez en bons deniers nombrez cent souz d'estevenens bons et loiaux pour ce je les doues maignies d'omes dessusdites et tout lour amaisement ay receu et repris de lui en fié Après je li devantdiz Girars cognois et confesse par cex presentes lettres que je oblige et enloe et ai obligé et enloiez et delivré et bailliez en la main audit Hugue mon signour com son fié les devantdites doues maignies d'omes avec tout lour amaisement por sexante soz d'estevenanz bons et loiaux que j'ay eu et receu en bons deniers nombrez doudit messire Hugue et vui et coman et outroi que lidiz messire Hugues durant la gagiere ait et preigne et reçoive desdites doues moignies de homes touz les profit et toutes les joiances que je en auroie et devroie avoir se je les tenisse sau ce que lidiz Hugues n'i puet faire prise Et lidiz messire Hugues me quitte et a quité durant ladite gagiere dou servise que je li estoie tenu pour raison dou fié dessusdit Et je lidiz Girars en nom de moi et de mes successours et de mes hoirs promet par ma foi et par mon soiremant adit mons Hugues que je les devantdites doues maignies de homes et lour amoisemant à lui et es suens garantirai et ferai de mon franc aluef contre toutes genz et que je ne venrai ne feray venir contre les devantdites choses et renonçois En tesmoignaige de laquel chose je lidiz Girars ai fait mettre en cex presentes lettres le seel de religious home frere Jaique abbé dou Mont Sainte Marie de l'ordre de Citeal et de la dyocese de Besançon ensamble le seel mons Huon curé de La Reviere Faites et données l'an Nostre Seignour qui corroit par mil CC octante et nuef ou mois de juenier