Charter Document - 02220284

Nous Hombers d'Arbois sires de Malarée et dame Oyde sa fame faisons savoir à touz que come nous aions eschangié à noble baron saige et puissant nostre bien amé signour Jeham de Chalon signour d'Allay et en nom de permutacion [et] d'eschange por nous et por noz hoirs aiens baillié quité et delivré à nostre devantdit signor Jehan et à ses hoirs toutes les choses les rentes les fruit les provenz issues et possessions que nous aviens deviens poiens et deviens avoir es viles es finaiges et es parrochaiges d'Orselle de Roches de Regne et de La Chapelle ne es appendises d'icelles en quelque maniere qu'elles s'estendent et soient nommées prises et jugiés pour toutes les choses les fruit les provenz issues et possessions que lidiz nostre chier sires avoit tenoit pooit ou devoit avoir es viles es finaiges et es parroches de Menay et de Vilerdes Templiers ne es appendises d'icelles c'est à savoir en homes en tailles en censes et en toutes autres choses coment qu'elles soient nommées prises ou jugiés ensi come il est plus planierement contenuz en unes autres lettres que lidiz messire Jehans at de nos seelées dou seel de la court de Besençon et dou seel de moy Hombert se les choses d'Orselle de Roches de Rainne et de La Chapelle et les appartenances d'ycelles ensi come dessus est dit ne valoient ou ne equipolloient de valour es choses de Menay et de Vilerdes Templiers que lidiz nostre chiers sires nos a bailliez en eschange et en nom de permutacion nous promettons loialment par noz foy donées corporelment de nous et de un chascun de nous sus sainz evangiles et par sollempnel stipulacion par devant le notaire cy dessouz nommez que nous à regart de mons Estene Giro et de un autre de la gent doudit nostre signour proudomes chavaliers ou autre home baillerons et delivrerons audit nostre chier signour Jehan de nostre terre à plus près de L'Estoille tant et de noz choses don il porroit avoir chescune année ce que les rentes et toutes les choses de Menay et de Vilerdes Templiers que il nous a bailliez et delivrez en eschange et en nom de permutacion vadroient plus lesquex valours les choses et les rentes toutes d'Orselle de Roches de Regne et de La Chapelle et les choses que il nous a doné en eschange encontre ne vadroient Item nous li devantdiz Hombers et Oyde sa fame confessons et cognissons par devant Bertolomet notaire cy dessouz nommé come per devant le commandement et jurey de la court de Besençon en lyu de venerable persone et discrete l'official de ladite court et avons confessé et cogneu en verté que nous tenons purement et devons tenir en fei doudit nostre chier signour Jehan et de ses hoirs devons tenir nous et nostre hoirs toutes les choses les rentes les fruiz les provenz les yssues et les possessions que lidiz nostre chier sires nos a eschangié et en nom de permutacion baillié et delivré es viles de Menay et de Vilerdes Templiers à ce que nos aviens ne poiens avoir es viles ne es appendises d'Orselle de Roches de Reynne et de La Chapelle ensi come dessus est devisez et ce qu'il nous delivreroit assi en eschange et en nom de permutacion à regart doudit mons Estene Girot de Montagu chevalier et de un autre de sa genz prodome se les choses toutes que il nous a eschangiés et en nom de permutacion baillié ne valoient les choses que nous avons ensit eschangié ensi come il est contenuz es lettres faites de nous et de lui et de ce nous sumes entrez en son homaige lealment et li avons juré feauté En tesmoignaige desquelx choses nous avons fait metre le seal de moy Hombert en ces presentes lettres et pour plus surtey des choses dessusdites avoir nous avons requis honeste persone et discrete l'official de la court de Besençon par Bertolomet de Gy clerc notaire juré et comandement de la court dessusdite qu'il vuille et dignoit metre le seal de ladite court en cex presentes lettres et en tesmoignaige de verité Faites et données l'an Nostre Signour mil CCIIIxx dix et sept le lundi devant la saint Denis