Charter Document - 02220283

Nous officiaus de la court de Besançon façons savoir que nobles damoiseaux et saiges Estevenez sires d'Oyseler ay confessé et cogneu en droit par devant nous lui avoir heu et receu de noble baron et puissant monsignour Jeham de Chalon signour d'Arlay mil livres de monoie usual et coursable en la cité et en la dyocese de Besençon en bone monée loialment nombrée don lidiz Estevenet s'est tenuz pour bien paié [et] pour laquel somme d'argent pour lui et pour son principal hoir qui tanra le chestel d'Oiseler est entrez en la feauté et en l'omaige doudit Jehan de Chalon signour d'Allay et li ai promis porter feauté et loiauté et lui recepter en son chestel d'Oiseler toutes fois que mestier li sera save la feauté de nobles barons monsignour Jehan de Chalon conte d'Auçuerre et signour de Rochefort et de ses hoirs et la feauté Hugue de Burgoigne à sa vie et saves les feautés à ces qui estoient homes de fié audit Estevenet devant la confection de cex lettres Et ces choses dessusdites a promis ledit Estevenet per son soiremant doné et toichié corporelmant sus saint evangile et per solempnel stipulacion por lui et por ses hoirs audit Jehan de Chalon et es suens tenir et garder fermement sanz jemais aller en l'encontre per lui ne per son consentement et a renuncié En tesmoignaige de laquel chose nous à la requeste doudit Estevenet avons fait mettre en cex presentes lettres le seel de la court de Besençon Fait et donné le mardi après saint Lorent l'an Nostre Signour MCCC et cinc