Charter Document - 02220281

Je Vuillaumes sires d'Arguel escuiers fay savoir à touz cex qui verront et orront ces presentes lettres que come je soie entrez en l'omaige et en la feauté de noble baron et puissant mons Jeham de Chalon signour d'Arlay et en aie repris en fié de lui tout quanque je ay puis et doy avoir en la vile de Buires de Pugey de Lerno de Busi et de Vorges et ou finaige desdites viles en homes en mès en terres en prés en vignes en rentes en censes en fié et rierefiez et toutes autres choses et ce que li anfan de Vennes tiegnent de moy à Busy et en la ville de Tornans pour quatre cenz livres de menoie corsable que j'ay heu et receu doudit mons Jehan par ensi come il est contenu en unes lettres seelées dou seal de la court de Besençon sus ce faites en tel meniere que je devoie faire valoir lesdites choses doux cens livrées de terre et se elles valeient plus lidiz messire Jeham dou sourplus m'en doit doner à regart de mons Girart d'Arguel mon uncle et de Rainon d'Arbois je lidiz Vuillaumes confessois et cognois que je hay heu et receu doudit messire Jeham trois cens livres de monoie corsable pour la muef vaillance des choses dessusdites extimées et esmées lealment par ledit messire Girart et Raynon desquelles trois cen livres je me tieng pour bien payez doudit messire Jehan et partant je enterinois ratifiois et approvois les lettres dessusdites seelées dou seaul de la court de Besançon origenament faites sus les choses desusdites Et promet per mon soirement fait et doné sus sainz evangiles corporelment que je ledit homaige et ladite feauté tanray et encontre ne vanray ne consentiray que autre y viegne sanz nul retenemant ne senz nulle autre chose mettre ni opposer encontre ces lettres ne encontre les lettres origenal sur ledit homaige faites Et quant es choses dessusdites tenir je obligeois moy et mes hoirs et mes biens en la main doudit messire Jeham et de ses hoirs et renonçois En tesmoignaige de laquel chose j'ay prié et requis honorable persone et saige l'official de la court de Besençon que il le seaul de ladite court mete en cex lettres en la juridicion de laquel court je ay submis et submet moi et mes hoirs pour tenir lesdites choses et à tenir vuil estre contraint per sentence d'esconmuniement se je venoie encontre Ce fut fait le sambadi devant Pasques flories l'an Nostre Signour mil CCC et six