Charter Document - 02220280

Je Guillaumes d'Abbens chevaliers fay savoir à touz que je suis hons liges à noble baron monsignour Jeham de Chalon signour d'Arlay sauve la feauté Vuillemin mon nevour et tesmoignois et cognois que je tien dou devantdit Jeham mon signour ma maison et mon chastel d'Abbens sauve la feauté doudit Vuillemin Et tesmoignois encor et cognois que je tien dou devantdit Jehan mon signour quanque je ay à pont de Molumbe en toutes choses en homes en estans en molins et ce que j'ay en la reviere de Douz dois ledit pont de Molumbe jusque à molin de Escucheset et six maignies d'omes de Viler Saint George Et toutes ces choses cognois je et tesmonois que je tiens dou devantdit Jehan mon signour nu à nu fuers que ma maison et mon chestel d'Abbens que je tien doudit Jehan mon signour sauve la feauté Vuillemin mon nevour En tesmoignaige de laquel chose je ai mis mon seel pendant en ces presentes lettres faites et données le mecredi l'endemain de la Chantelouse l'an de l'incarnation Nostre Signour Jesus Crist corrant par mil CCIIIxx et doux