Charter Document - 02220279

Je Vuillaumes d'Abbens chevaliers fay savoir à touz que je tieng en fié et en chasemant de la noble dame Lore çay en arriers femme le noble baron Jehans comte de Bourgoigne et signour de Salins le pont de Orselle sous Abbens et le pontenaige et le port de l'abergement que y est et tout quantque fait y ay de edifiz et de cressance et ferai je et li miens en prel en champ en bois en rivieres en molins et en fours et en toutes autres choses et dix maignies d'omes à Viler Saint Gorge et Hugue mon serjant de Viler Saint George et quantque je ai en ladite ville Et de ces choses je suis hons à ladite dame sauve la feauté à mes nevours d'Abbens et la feauté à mon amey signour de Monfacon Et ces choses je promet à ladite dame Lore loiament et à bone foy garantir franches et quites d'autre fié En tesmoignaige de ceste chose je ay mis mon seel pendant en ces presentes lettres que furent faites en l'an de l'incarnation Nostre Signour qui corroit par mil doux cenz sexante et douze ou mois de joing