Charter Document - 02220278

Je Guillaumes diz Chantenoy de Jolains chevaliers fay savoir à touz que je suis hons et entrez en l'omaige de noble baron messire Jeham de Chalon signour d'Allay mon bien amé signour sauve la feauté de mes autres premiers signours qui sont outre la Jou per devers l'aveschiez de Losanne Et cest homaige j'ay fait à mon devantdiz signour d'Arlay por le pris de sexante livres de petit tornois lesquex je hai eues et receues doudit messire Jeham et tenuz m'en suis pour bien paiez Et ay promis et promet audit messire Jeham de Chalon signour d'Arlay par mon soiremant doné sus sainz evangiles et par stipulation solempnel que je le aiderai et vendrai à ses mandemans à armes toutes les fois que je en serai requis par lui ou par ses lettres encontre toutes genz à cui il aura affaire outre la Jou par devers l'arceveschié de Besençon En tesmoignaige de laquel chose je ay prié et requis à religiouse persone et honeste Jaque humile abbé dou Mont Sainte Marie que il mete son seal en ces presentes lettres en tesmoignaige de verité ensamble le mien seal Ce fut fait et donné l'an Nostre Signour corrant par mil doux cenz nonante et huit ou mois d'avril