Charter Document - 02220277

Nous officiaux de la court de Besencon faisons savoir que Guillaumes diz Moutons dou Saçoy damoisiaux ait cogneu en droit par devant nostre comandemant que il a repris en fey et en chasement et est entrez en l'omaige de noble baron monsignour Jeham de Chalon signour d'Allay de toutes les choses que lidiz Guillaumes Moutons a et tient à l'ile qui siet en la reviere de Broinne par ensi comme lidiz Guillaumes Moutons le tenoit en fié et en chasemant de mons Henry de Chemins chevalier et de dame Aelis sa fame c'est assavoir en homes en eaux en sieges de molins en pescheries en rentes en signories en champs en mès en fiez en justices grant et petites en prez bois et toutes autres choses queles qu'eles soient Et a promis lidiz Guillaume Mouton par devant ledit nostre commandemant par son soiremant doné sus saints evangiles que il contre les choses devantdites ne venra ne fera venir per lui ne per autres mais fermemant et sanz corrumpre les gardera et a volu et outroiez lidiz Guillaumes que se il venoit encontre les choses dessusdites ou contre aucunes d'icelles que nous le controignons et façons controindre per sentence d'escommuniemant et s'est submis et submet lui et ses hoirs quant à cex choses dessusdites tenir et garder à la jurisdicion de la court de Besençon et a renuncez En tesmoignaige de laquel chose nous à la priere doudit Guillaume faite à nous par ledit nostre commandemant avons mis le seel de la court de Besençon en cex presentes lettres faites et données le lendi devant la feste des apostres Symon et Jude l'an Nostre Seignour corrant per mil doux cenz quatre vinz et dix