Charter Document - 02220276

Nous Mahauz contesse d'Artoys et de Burgoigne et dame de Salins faisons savoir à touz que comme messire Girars d'Arguel fust venuz par devant nos et eust conneu en nostre presence qu'il avoit fait son heir en touz ses bienz haut home noble et puissant messire Jehan de Chalon seignour d'Allay nostre chier uncle et nos requeist que nous ledit Jeham reçuissions en nostre homaige dou fey d'Arguel que lidiz chevaliers tenoit de nos ligement lequel fié il deleissoit en nostre main et nous aions volu et aggreé les choses desusdites se insi est que nos le puissons faire et lidiz Girars ausi selonc le droit et selonc la costume dou pais nous por nous et por noz hoirs avons receu en nostre homaige lige ledit messire Jehan por lui et por ses hoirs dou fié d'Arguel dessusdit selonc ce que li fié l'aporte sauf le droit de nous et d'atrui En tesmoignaige de ce nous avons mis nostre seel en cex presentes lettres données à Paris le mecredi après mi queresme en l'an de grace mil CCC et cinc