Charter Document - 02220275

Je Hugonin de Morpré escuiers demorant à Durnon et je dame Guillame sa fame fille çay en arriers mons Girart chevalier signour d'Aresche faciens savoir à touz que nous en acressement dou fié à noble baron monsignour Jeham de Chalon signour d'Allay avons repris de lui de fié sexante et [cinc] livres de viennois assises sus doux cartiers de chadiere assis à Salins ou puis dou bourt le conte de Burgoigne palazin et sunt assises lesdites sexante et cinq livrées de viennois sus lesdiz doux cartiers de chadiere de messire Bauduin Engarrant chevalier pour la raison de ce que messire Jehan Engarrant chevaliers mes premiers mariz ses freres les reçut de mon mariaige prometanz anduy ensamble et un chescun por luy adit noble baron et es siens par stipulation sollempnel et par noz fois donées corporelment à tenir fermemant les choses devantdites et à garder senz corrumpre et non mie venir en l'encontre ne par nos ne par autres et non consentir que nuls vuille venir à l'encontre dois ores en avant ne per fait ne per parole ne apparamment ne resconduement Lesquex sexante et cinc livres de viennois nos avons repris de fié pour dix livres d'estevenans bons et despendables lesquex nous avons heues et recehues doudit noble baron en bon deniers nombré et de cex nos nos tegnons por bien paiez renonçant En tesmoignaige de laquel chose nous li devantdiz Hugues escuiers et dame Guillames avons requis et fait mettre en cex presentes lettres le seaul dou chapitre de l'iglise de Saint Anathoille de Salins Ce fut fait en l'an de l'incarnation Nostre Signour qui corroit per mil doux cenz quatre vinz et quatre ou mois de may