Charter Document - 02220270

Je Hugues sires de Rens fay savoir à touz que com je tenisse ligement en fey Saint Agne mon chestel de l'yglise de Buillon de l'ordre de Cyteaux de la diocese de Besençon je dou fié de Saint Agne suis entré en l'omaige lige à la noble dame Lore femme çay en arriers le noble baron Jeham conte de Burgoigne et signor de Salins par la volunté et par le comandemant exprès Henry abbé de ladite eglise de Buillon Et est assavoir que je ay repris en acressement doudit fey quanque je ay et puis et dois avoir en toute la ville de Salins en lieu des bours et en l'autre et es apartenances de Salins en homes en muire en signorie en justice et en toutes autres rentes et issues quel qu'elles soient et tous les fiés et les rierefiez que l'on tieng de moy et doit tenir c'est à savoir tant gentilhomes que serjant à Salins quelque part que lidiz fié soient sauz ma vigne de Foiante Et ay repris de luy encor en accressement doudit fiez quantque je ay puis et doy avoir ou terretoire de Gerraise en prés en bois en champs en justice en signorie en fey et en rerefey et en toutes autres rentes quel qu'elles soient Et est à savoir encor que Jehans mes fiz est entrez en l'omaige de ladite dame doudit fié de Saint Agne par ma volunté et par le commandement audit abbé et par la requeste et desdiz accressement doudit fey ansi pour ce que aucunes choses en tenoit lidiz Jehans Et je lidis Jehans ansi come dessus est dit suis entrez ligement en l'omaige à ladite Lore par le commandement audit abbé et par la volunté mondit pere doudit fié de Saint Agne et des apertenances et ansi ay fait toutes les devantdites choses cum elles sont dessus dites Et nous li devantdiz Hugues sires de Rens et Jehans ses fiz promettons à ladite Lore par nostre soirement que nous contre les devantdites choses ne acune d'elles ne vanrons par nous ne par autruy ne consentirons que autres y viegne mais toutes les devantdites choses i maintiengrons et garantirons en droit de fié à ladite Lore et à ses hoirs contre toutes genz En tesmoignaige de cex choses je lidiz Hugues sires de Rens ay mis mon seaus pendant en cex lettres Et je li devantdiz Jehans fiz dou devantdiz Hugues signour de Rens pour ce que je n'ay seal ay fait seler cex lettres dou seaul à religious home Jehan abbé de Goille Ce fut fait l'an Nostre Signour mil CC septante et trois ou mois de mars