Charter Document - 02220262
| Charter Number: | 02220262 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1280 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.536) |
Charter:
Je Haimes diz Raschaz de Saint Lothain chevaliers fai savoir à touz que je suis entrez en l'omaige à la noble dame Lore feme çay en arriers le noble baron Jehan conte de Bourgoigne et seignour de Salins et hai pris de ly et tieng en fié et en chassement quanque je et Jaquemins mes freres havons et devons ne poons havoir ou parrochaige de Mintrey en boys en chans em prez en vignes et en toutes autres choses en quelque maniere que nos les i haions Et ledit fié hai je fait par le lous et par la volunté doudit Jaquemin mon frere pour moi et pour les miens et à ladite contesse et es siens En tesmoignaige de ceste chose à la proiere et à la requeste de moi et de Hemonin mon frere li religious hons et honestes priours de Vaux ha mis son seal pendant en ces lettres en tesmoignaige de verité Ce fut fait le venredi devant Pentechoste l'an Nostre Signour mil et CC et LXX ou mois de may