Charter Document - 02220261

Je Villemins diz Tartarins fil çay en arriers mons Hugon de Charencey fai savoir à touz ces qui verront ces lettres que je suis devenuz hons liges devant touz à la noble dame Lore feme çay en arriers le noble baron Jehan conte de Bourgoigne et signour de Salins sauve la feauté Odon mon frere et hai repris de ladite dame en fié ligement et permaignablement dous maignies d'omes que je hai à Rurey c'est à savoir Amiet et Oudehour et ses enfanz et trois bichat de blé que je hai ou dime de Viler desouz Montron et dou parrochaige et une pescherie que je hai à Rurey et l'uictime partie dou molin de Rurey et doux fauz de prez et dix jornal de terre arable et quanque je hai ne puis havoir esdiz leus en prez en chans en molins en pescheries et en toutes autres choses En tesmoignaige de ceste chose je hai fait mettre en ces lettres le seal de la court de Besençon Et nous li official de Besençon à la proiere et à la requeste doudit Vuillemin havons mis le seal de la court de Besençon Ce fut fait l'andemain de Penthecoste l'an Nostre Signour qui corroit par mil et CC et LXVIII