Charter Document - 02220247

Je Huguenins fiz mons Wachier chevaliers dit Put de Livier fai savoir à touz que je hai pris en fié par le consentement Vuillermete ma fame de mons Huguon seignour de Usies et de ses hoirs toutes les choses que je et ladite Vuillemete ma fame tenons de part soi ou terretoire de Livier et les en havons prises ligement à tozjoursmas Et je Willemete devantdite de part cui li heritaige muet promet estaubli Huguenin mon mari de garandir loyament les choses dessusdites contre toutes genz par ainsi comme ligece aporte adit seignour de Usies et à ses hoirs c'est à savoir en la fin dou Tollon ou Grant champ III jornal et dessus I jornal et demie et II pieces esquex il ha I jornal I jornal en autres II pieces I jornal dessoz le gros Boschaz III jornals es Trossaz III jornals es Sollaz à Senrez III jornals en l'autre fin au Boschaz Bergyn VIII jornals et dessoz le Rocheroy I jornal desus I jornal ou champ de l'Espine I jornal à la Gravelete I jornal desoz IIII jornals d'autre part I jornal et demie à Cembecour II jornals et demie ou champ de la Sauce et en la pieces I jornal et demie desus I jornal et demie à la Geline VI jornals en soie Belchat I jornal et demie en la tierce fin ou champ de Moler quatre jornals ou champ de la Serable III jornals ou champ desoz III jornals après II jornals en la voie dou Chastel I jornal et demie en l'Ortyois II jornals es Combes III jornals ou Contour I jornal ou champ des Braies I jornal en la combe Fumée à quatre soiteurs desoz a II à la Gesine a doux à Soillaz a IIII es Plains Quarriers a VI en la plain de la voie de Usies a II ou prez dou Bernart a III en Tendon a II Après en chesaux et en cens le chesaul où la maison mons Odon d'Esterno chevalier siet le chasal à Vallet dou Rocheroy XII deniers sus les Ailleri I emine de froment le chesal Artes chié Cheverner sus Girart le Clerc VI deniers sus Gervier son frere IIII deniers et qui doit XXII deniers de cens le chasal Baiet II sols le chassal es anfanz Brunetan XII deniers Toutes les choses desus nommées et le plus que l'on troveroit de part le mariaige à ladite Vuillemete nos li devantdiz Huguenins et ladite Vuillemete les havons pris ligement dou devantdit Hugon signour de Usies et de ses hoirs et lour avons promis et prometons per noz soirement donné sus saint evangiles que nos lour garderons loyamant à bone foy contre toutes genz et enseignerons se nos plus en savons ne trovons par ainsi come ligece l'aporte Et pour ce que nos cestes choses dessus nommées havons prises de fié nos havons heu doudit Huguenin seignour de Usies et de ses hoirs XXV livres de vianois en bons deniers nombrez et je la devantdite Vuillemete sexante soz de vianois por une robe à moi Et pour ce que ce soit certaine chose et estable nos havons fait saeler ces lettres par nostre proiere et par nostre requeste dou sael à religious baron Wauchier abbé de Goyle et dou sael Renaut curé et chanoine de Saint Anathoile de Salins en tesmoignaige de verité Ce fu fait en l'an de l'incarnation Nostre Signour qui corroit par mil et CC et sexante et onze ou mois d'avril