Charter Document - 02220243

Je Guienez diz li Roz de Collaour escuier fai savoir à touz que je de ma bone volunté et pour mon profit hai pris en fié et en chassement dou noble baron mons Jehan de Chalon seignour d'Arlay mon amé seignour ces choses ci après contenues premieremant desoz Mullie un chan que Blanchez tient ouquel il ha I jornal et demie de terre encour ou Besaul I pose encour es chans Montainges après la terre Guillemins de Ruffye II jornaux entre les champs et le pré encour es Vilers delez les Oiseroiz I champ qui tient une poise encour à Voier et à Grefe I jornaul ou Courar devant la vile de Collaour I journal de terre es prez delez Estiene de Roseiz I journaul en Largilloys et es Courars III journaus es Paletes I poise outre Valere I journal de terre en Besaice I jornal et trois pieces de bois encor es Bergeus I jornal encour au courtil devant le Mostier I journal encour en combe Duou I journal es Rameres I jornal encor outre Valere I jornal à Sage I jornal encor ou Chestelez I jornal encor à Pontabelot I pose de terre et I septure de pré Pour raisons desquel choses je cognosse avoir heu dou devantdit mons Jehan mon seignour XX livres d'estevenens desquex je me tient por paié Laquel assignacion de terre je promet par mon soiremant doné corporelmant sus saint evangile tenir et atendre adit mons Jehan et es suens et non mie venir encontre dès or en avant par moi ne par autrui En tesmoignaige de laquel chose je hai proié et requis religiouse persone et honeste frere Rougier humile priour de Lons et mons Estene de Collaour mon amé seignour que il metent lour seax en ces presentes lettres lesquex je hai pour autentiques en ceste partie Ce fut fait et donné l'an Nostre Signour corrant par mil CC octante et nuef ou mois de decembre