Charter Document - 02220242

Je Marguerite dame de Belevevre fai savoir à toz que je hay pris et tieng en fié et en chassement de noble baron mons Jehan de Chalon seignour d'Arlay Charencey sur Loue l'une maison fort et l'autre c'est à savoir ce que messires Wachiers d'Andelost tient de moy esdites doues maisons et es appartenances et quanque lidiz messires Wachiers tient ou puet tenir ou doit de moy esdites doues maisons et es appartenances soit en fié ou en rierefié en justises en homes en terres arables et non arables en prez en boys en chans en revieres en pescheries et en toutes autres choses quel que eles soient appelées pour le pris de quatre vinz livres d'estevenans que je hai receu doudit mons Jehan en bons deniers nombrez Et ces choses dessusdites ainsi comme eles sunt dessus devisées je promet tenir et garder fermemant pour moi et pour les miens per mon soiremant doné sus saintes evangiles et non venir encontre par moy ne par autrui ne consentir venir hou tans çay en avant et renonçois Et pour ce que ce soit ferme chose et estauble je hai proié et requis honorable baron et saige le official de Bessençon que il mate le seal de ladite court en cest presentes lettres en tesmoignaige de verité Faites et donées II nonas februarii l'an Nostre Seignour mil CCIIIxx et V