Charter Document - 02220240

Je Estevenez sires de Ceys fai savoir à touz que je tieng en fyé et en chassement de la noble dame Lore fame çai en arriers le noble baron Jehan conte de Bourgoigne et seignour de Salins la maison fort mons Odon de Fertans et tout quanque lidiz Odes tient ou doit tenir de moi de fyé en la maison fort Perrin de Fertans qui soloit estre prevoz de Fertans et toutes les choses que lidiz Perrins tient ou doit tenir de moy Et tieng encour de ly quanque messires Wis de La Sale tenoit de mon pere et quanque messires Estienes de Faye tenoit de mon pere et quanque messires Guis de Fertans tenoit de mon pere Et tieng encour de ladite [dame] Lore quanque je hai et puis havoir et doy avoir à Fertans et es appertenances en jostises et en seignories et en toutes autres choses sauz les dymes et l'eglyse de Fertans que je ne tieng pas de ly Et tieng encour de ladite [dame] Lore le Migeoys d'Albone et son meis et la maison que je dois faire à Mommaour et de ses choses suis ses hons et en son homaige Et est à savoir que cum lidiz cuens haust achetez dou priour de Mostier Aute Pierre et de l'abbé de Clugney homes et meis à Nam qui de l'avoierie et de la garde mon pere estoient je doing et quite à ladite [dame] Lore ma dame et à ses hoirs tout le droit et toute la raison que mes peres havoit et devoit havoir en ladite vile de Nam Et toutes ces choses je promet à garder et à tenir loyamant et en bone foy En tesmoignaige de ces choses pour ce que je n'ai sael à ma proiere et à ma requeste Girars sires de Durnay mes amez coisins et religious hons et honeste Richars priours de Mostier Aute Pierre hunt mis lour seaux pendant en cest lettres Ce fut fait ou mois d'avril l'an Nostre Signour qui corroit par mil CC et sesante et douze