Charter Document - 02220239

Je Guatiers d'Arlay diz Forestiers fai savoir à touz que je suis hons lieges de main à noble baron mons Jehan de Chalon seignour d'Arlay et hay repris de luy en fié liege tout quanque je hai en heritaige et en conquises faites et à faire sauz son fié façant et sauf ce que je tieng d'autrui en fié Et tieng encour de lui en fié lige le mès es enfanz Guillemin Dou Pin d'Arlay qui par es enfanz Bertoiat d'Arlay louquel maix je hai conquis par le lous doudit mons Jehan et de mons Guion de Trenay qui de lui le tenoit en fié Et est encour à savoir que je ne puis ne doy riens conquerir sus mondit signour ne sus ses homes ce n'est par son lous En tesmoignaige de ceste chose je hai mis mon sael pendant en cest lettres ensamble le sael de honeste persone mons Guillaumes dyen de Lons Faites et données le mardi après la saint Hylayre l'an Nostre Signour corrant par mil doux cenz et huictante et trois