Charter Document - 02220237

Je Blanche dame d'Esnens feme monsignour Symon de Neblans chevaliers fai savoir à toz que je hay vendu ballié et delivré à noble baron mon amé signour monsignour Jehan de Chalon signour d'Arlay luy et es siens à tozjoursmas le fié de Monjay et les appartenances doudit fié en quelque chose que eles soient soit en maisons fort en maisons plaines en homes en boys em prez en champs en terres arrables et non arrables et en toutes autres choses quel que eles soient ne commant que eles soient appelées et especialmant le fié que Symonins de Vaudrey tient ou doit tenir de moy et lou fyé que Henry de Chemins tient de moy pour le pris de cenz livres d'estevenans lesqueles je ai heues et receues doudit monsignour Jehan en deniers nombrez Et renonçois par mon sairemant donné corporelmant sus sainz evangiles à l'exception que je ne puisse dire que je ne haie heues entierement lesdites cenz livres et receues et que eles ne soient tornées en mon profiet Et le devantdit fié de Monjay par ainsi come il est dessus dit et devisé por toutes choses je reconois que je le tenoie doudit mons Jehan en fyé et en chassement Et de ces choses dessusdites je me suis desvestue pour moy et pour les miens et ledit mons Jehan et les suens en ai envestu par ces lettres et ces choses je promet par mon soiremant garder fermemant et non venir encontre par moy ne par autruy et renonçois En tesmoint de laquel chose je hay proié et requis honorable baron et saige le official de Bessençon que il mate le sael de la court de Bessençon en ces presentes lettres L'an de grace mil CC[C] et six