Charter Document - 02220236
| Charter Number: | 02220236 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1265 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.496) |
Charter:
Je Richars de Neblans chevaliers sires de Nores fai savoir à touz que j'ay mis et met en la main et en la bone garde ma très chiere dame Lore le fié de Monjay que je tieng de ly et vuill et commant que cil qui de moi le tiegnent en respondent et obeissent à ly ainsi com il feroient moi proprement tanque à ma revenue d'outre mer ou de mes hoirs Et quelque chose qu'ele en ordeneroit à son honour et à profiet de ly et de moi et de mes hoirs je le vuil et outroie et le tient pour bon et pour estauble et gerans Et ce que j'ai à Vincenz lesques choses sunt de son fié je met et ai mis ainsi en sa main et en sa bone garde bien et loiament et les issues qui an saudront dois or en avant mete et face mettre an avant comme ma loyax et bone dame à son honour et à profiet de ly et de moi et de mes hoirs si com il est devant dit En tesmoint de laquele chose j'ai saelé de mon sael ces presentes lettres faites en l'an de grace qui corroit par mil CC sesante et cinc la voille de l'assumpcion Nostre Dame