Charter Document - 02220233

Je Perrins d'Arçons fil çay en arriers Estevenons d'Arçons faiz savoir à touz que je non mie deceuz ne baratez mais de ma bone volunté reconois et di en verité que je suis devenuz hons le noble baron mons Jehan de Chalon seignour d'Arlay save la featé mons Jehan de Jouz signour de Coloigney et suis entrez en l'omaige doudit mons Jehan et hai receu et pris en fié doudit mons Jehan mon signour sesante soudées de terre de mon propre alue et sont assises lesdites sesante soudées de terre ou val de Usies c'est à savoir le meys Basset d'Usées et ses enfant Perrin et Paris ensamble les appendises et les appartenances doudit meys prometant par mon soiremant doné sus saint evangile que se lidiz meis ne valoit lesdites sesante soudées de terre que je les parfarai ou val d'Usées à l'esgart des prodomes renonçant En tesmoingnaige de laquel chose j'ai requis et fait mettre en cest lettre le seel dou religiou home frere Jaique abbé dou Mont Sainte Marie Ce fut fait le jours de la feste saint Denis ou mois d'octouvre l'an Nostre Signour MCC octante et sept