Charter Document - 02220230

Nous Jehans diz de Branciun fil mons Ponçon chevalier et la Guye sa fame façons savoir à toz que nos de nostre bone volunté non mie mené par force ne par paour ne par tricherie sumes entrez en l'omaige lige de la noble dame Lore fame çay en arrier dou noble baron Jehan conte de Bourgoigne et seignour de Salins et en avons pris en fié lige nostre vigne qui siet ou lue que l'on appele Vayse entre la vigne Berthe et la vigne de l'iglyse de Saint Anathoile de Salins que Girars li Barbier tieng Et prometons et avons promis à ladite dame per nostre foy ladite vigne qui part à nous de li en fié lige franche et quitte garantir et deffendre et appaisier contre toutes genz et en tous leus et que contre ne venrons per nous ne per autrui et renonçons En tesmoint de laquel chose nos havons fait mettre en ces presentes lettres lou seal dou chapitre de Saint Michiel de Salins Ce fut fait l'an Nostre Signour qui corroit par mil CC et sexante huit ou moys de decembre