Charter Document - 02220223

Je Mercial de Mailley chevaliers sires de La Parriere fais savoir à touz que je par le loux et par la volunté de Jeham et de Perrin mes anfans regardé le conu profit de moi et d'as en ma propre santé et de ma bone volonté hai doné et quité plainemant permenablemant sanz nul retinal de moi et des miens tout le fié que Thiebat sires de Nuefchastel tenoit de moi à Rans et à Rainchat et à La Barre et es appartenances en quelque meniere que estre poist à noble baron Jeham conte de Bourgoigne et signour de Salins pour les biens et pour les courtoisies qu'il m'a fait et m'an suis devestiz et lui an ai envesti ainsi come miez porrai entandre à son profit et au profit de ses hoirs abrenunciant En tesmoignaige de laquel chose j'ai mis mon seal pendant en ces presentes lettres à ma priere et à ma requeste et de mesdiz anfanz Jeham et Perrin Estenes sires d'Oiseler et Guillaumes diz Desréez chevaliers ont mis lour seax pendans auvec le mien en ces presantes lettres en tesmoignaige de verité qui furent à ceste chose faire Ce fut fait l'an de l'incarnation Nostre Signour qui corroit per mil et CC et cinquante et doux ou mois de decembre