Charter Document - 02220222

Je Girars sires d'Arguel fais savoir à touz que li nobles bers Jeham de Chalon sires d'Arlay mes sires m'a doné permaignablemant en accroissemant dou fié que de luy tieng [à] moi et à mes loiaul hoirs que je auroie de mon cors qui tanroient ma fort maison d'Arguel cent livres de rente à estevenans de sa rente dou pois de Salins as dous termes c'est assavoir le jor de la nativité saint Jeham Baptiste cinquante livres d'estevenans et le jor de la saint Andrey L livres d'estevenans Et cest don m'a il fait par le lox et par le consentemant dou très noble et puissant baron Othon conte de Bourgoigne palatin en tel meniere et en tel condicion que se je trespassoie de cest siegle sanz havoir loiaux hoirs de mon cors que lesdites cent livres de terre à estevenans doient torner et revenir audit Jeham de Chalon mon signour ou à ses hoirs ou à ses escheanz quitemant Et est assavoir que je ou mes loiaus hoirs que je hauroie de mon cors qui tenront ma fort maison de Arguel devons recepter en madite fort maison de Arguel ledit Jeham de Chalon signour d'Allay mon signour à grant force et à petite contre toutes genz fors que contre le conte de Bourgoigne Et est encore assavoir que nuns de mes hoirs ne puet tenir ne doit lesdites cent livrées de terre fors que cilz de mes hoirs loiaux que je hauroie de mon cors qui tenront ma fort maison de Arguel En tesmoing de ceste chose je hai mis mon seel pendant en ces presantes lettres faites et données le jour de Penthecoste l'an Nostre Signeur corrant par mil CC octante et trois