Charter Document - 02220220

Je Renaus de Faletans chevaliers et je dame Sebile façons savoir à touz ces qui verront ces lettres que nous havons pris en fié et en chasemant perpetuel de la noble dame Lore la piece dou bois de Sales et la quarte partie de Plain bois et ce que nous havons deviron et ce que nous havons en Brumon et deviron Brumon et la moitié dou bois de Tanmeres et la moitié des chasaz et quamque nous avons deis Pymont le chastel envers Saule en homes em bois en champs en prez en vignes et en toutes autres choses fors le dieme de Chaverey et en sumes antrez en l'omage de ladite dame pour li et pour ses hoirs Et promettons à ladite dame par nostre soirement corporelmant doné sus sains ewangiles por nos et por les nostres garantir ledit fié à nostre pooir à lui et as suens et que nous encontre ces convenances ne vendrons par nous ne par autrui ne soffrirons que autres hi viegne et guerpissons à tout droit et à toute action que aidier et valoir nos porroit et venir encontre lesdites convenances En tesmoignaige de ceste chose à nostre priere et à notre requeste li honestes et li honoraubles homes Pierres priour et Willaumes diens de Lons hont mis lour seaux pendans en ces lettres Ce fu fait le jour de la saint Vincent l'an Nostre Signor qui corroit par mil CC et sexante et nuef