Charter Document - 02220219

Nous dame Beatrix fame çay en arriers mons Richar à Put de Levier chevalier et Vauchier ses fiz par communal consentemant et pour nostre profit non mie deceus ne menez par force ne par paour ne par boidie façons savoir à touz que cum nous tenons en fié et en chasemant de la noble dame Lore fame çay en arriers à noble baron Jeham conte de Bourgoigne et signour de Salins Aubert li fil Gramaru Perrenin Clopart Fauconet li filz Paris Paris Cicaudain et Hugues dit Gras de Boys son fil Vienet Crespaul Seguin Ferveal Villerme Rechaigne et Valnier le fil Fervel de Levier lor et lor mès et lor tenemant en accroissemant doudit fié havons repris et reprenons de ladite dame sus la Meserance un jornal de terre gaignable es Tilles dous ou Saucey sept en l'Auteroie cinc à pomier Chavanuns trois ou pré Pain un et demie ou champ Moutonier un en la Voie dous et demie en la roie de Huyens trois en la Sauce un et demie en Lutoois un et demie en Rocherois un en li combe de Lutiois dous et demie en Laillier huit et demie derrier chiés mons Guion un en essart Teillar dous en la Valpillete dous ou champ dou Puis dous en la Bineri cinc et demie en assart Aillay quatre septures de pré es Tilles trois septures de pré es Plains Quartier cinc septures ensum le champ des Tilles trois septures es Sollaiges quatre au pomier Chevanun une septure en la combe Summa cinc septures en la Roie trois septures ou pré Catheronet trois septures deçay des combes Garnier quatre septures Renaut le Jugler et son mès et quanque nos havons et tenons et poons et devons havoir à Livier et es apertenances en homes en mès en chams en prés en cens et en toutes autres choses quel qu'eles soient Et prometons à bone foy garder et maintenir ces choses contre toutes gens franches et quittes de touz autres fiés et prometons per notre soirement fait corporelmant à ladite dame que encontre ces choses devantdites ne vendrons per nous ne per autruy et renonçons par nozdiz soiremant à tout droit escript de canon et de loys par quoi l'on porroit venir encontre ces lettres et encontre cest fait et je lidiz Vachier à l'exception de menour aige et au benefice de restitution enterainnemant En tesmoignaige de laquel chose nos ladite Biautrix et Valchier ses fiz havons proié es honoraubles hommes à chapitre de l'iglise de Saint Michiel de Salins que lour seaux meissent en ces lettres Ce fut fait le diemanche de Pasques cluses l'an de l'incarnation Nostre Signour qui corroit par mil CC sezante et onze