Charter Document - 02220218

Nous Girars dit d'Aresche chevaliers et dame Alys sa fame façons savoir à touz que nous avons pris en fié et en chasemant dou noble baron Jeham de Chalon signour d'Allay vint livrées de terre sus quanque nous havons et povons havoir à Dornon as apartenances et ou finage doudit lue sauf le mariaige Guillaume nostre fille en tel meniere que se plus hi avoit de vint livrées de terre nous le devons parfaire en bone foy à l'esgar de prodomes Et promelons audit Jeham par nos soiremant doné sus saint ewangiles corporelmant tenir ledit fié ensi cum fait est et que nos encontre ne vindrons per nous ne per autrui ne soffrerons que autres y viegne En tesmoignaige de ceste chose nous havons fait saeler ces lettres dou seal dou chapitre de l'iglise de Saint Michiel de Salins Faites et donées l'an de l'incarnation Nostre Signour qui corroit par mil CC et sexante et quinze