Charter Document - 02220217

Je Estenes de Remeilley donzeaus fais savoir à touz que je requenois et di en bone verité que je suis hons lieges à noble donzeal Jeham de Chalon signor d'Allay et hai pris et pren de lui liegemant en fié toutes les choses ci desouz escriptes qui sunt en la vile de Dornon ou finaige et ou territoire et as appartenances de ladite vile premieremant le tenemant as anfans Haimonet Brodeal c'est assavoir Huydelon le Moigne et Lambert le tenemant Humbert fil Arembour le tenemant as anfans Trainchant c'est assavoir Doenet Besençon et Estevenim le tenemant Robert à Loste et le tenemant à Creyspillat le tenemant à Lesvoilliez et à ses freres le tenemant Estene au Grant et à son frere le tenemant au Boudier qui doit dix sous le tenemant au Voray le tenemant Malfoillet et Jovenier son frere le tenemant au Chevrier le tenemant Jeham Montaigney le tenemant Jaquier et le tenemant as anfans à la Pluschiere et quanque je hai puis havoir et doi avoir en ladite vile de Dornon ou finaige et ou territoire et as appendises dessusdites en homes en tenemanz en maisons en courtiz em prez en champs en pasquiers em bois en signorie et en toutes autres choses quel que eles soient et par quel raison je les hi aie Et pour cet homaige que fait hai audit Jeham et pour les devantdites choses que prises hai de lui ligemant en fié lesqueles choses soient de mon franc alluef lidit Jehans mes sires m'a doné quarante livres d'estevenans bons et despendables lesquel je hai eu et receu de lui en bons deniers nombrez et m'en tieng pour bien paiez Et toutes ces choses devantdites hai je fait par le lox et par le consentement Aignel ma fame Et je ladite Aigneal fame doudit Estene toutes les devantdites choses loe outroy et m'i suis consantie et consant et hai abrenuncié et renuncé en cest fait par mon soiremant doné sus saint ewangile corporelmant au benefice et à l'aide de douaire et de mariaige fait pour noces et requenois en verité que atant m'est assignez autre part En tesmoignaige de laquel chose nos li devantdiz Estenes et Aigneaux sa fame avons requis et fait metre en ces presantes lettres les seaux des chapitres de Saint Michiel et de Saint Morise de Salins Ce fu fait l'an de l'incarnation Nostre Signour qui corroit par mil et doux cenz et septante et huit ou mois de novembre