Charter Document - 02220216

Je Guillemins çay en arriers fiz monsignour Perron dit Put de Lyvier chevaliers fais savoir à touz que je requenois et diz en bone verité non mie deceuz ne contrainz ne par force ne par paour ne par proieres mais de ma propre velonté que je suis hons liges à noble baron Jeham de Chalon signor d'Arlay sauve la feauté le signour de Monferrant et hai repris de lui en accroissemant dou fié que de lui tenoie et tieng les choses ci desoz escriptes ce est assavoir la moitié de sept septures de prey qui sunt em pré Wiber la moitié de quatre septures em pré Sainte Marie la moytié de trois septures em pré Coutyn la moitié d'une septure en prey au Chevriz la moitié de VI septures et demie en la mie de Conrenon la moitié de IX septures ou byeler de la Chaldar la moitié de cinc septures ou premier champ dever Doncour et la moitié de cinc septures et autres dous chavons dessus le prey de la Chaldar la moitié de VI jornaus de terre arauble en champ d'Andelot la moitié de trois jornaux ou fel Saprey la moitié de quatre jornax derriers ma maison de Dronon la moitié de douze jornaux en la fin de Fontainne la moité de six journaux en la Vie et Vinet mon home qui est fiz à la Pluschiere Et por ces choses dessusdites que doudit Jeham mon signour hai repris il m'a donné VII livres d'estevenans bons et loiaux lesquex je hai heues et receues de lui en bons deniers nombrez et m'an tieng pour bien paiez et en quite ledit Jeham mon signour et ses hoirs pour moy et pour les miens Et ceste chose ai je faite par le loux et par le consentemant et par l'outroi Huguetain ma fame Et je ladite Huguete me consent en cest fait et le lou et outroy et [tien] por estauble et abrenuncie en cest fait par ma foi fiancié à benefice de douaire et de dons faits pour noces et reconois et diz en verité que autre part m'at atant assigné doudit douaire et doudit don fait por noces Et je lidiz Guillemins ai promis et promet adit Jeham mon signor par ma foi corporelmant donée garder et tenir fermemant les choses devantdites et que je jemas encontre ne vendray ne feroy venir autre encontre En tesmoignaige de laquel chose je lidiz Guillaumes et je ladite Huguete sa fame havons fait metre en ces lettres le seal dou chapitre de l'iglise de Saint Michiel de Salins Ce fut fait l'an de l'incarnation Nostre Signor mil CC et sexante et seze ou mois de marz