Charter Document - 02220215

Je messires Jaiques de Nam chevaliers fais savoir à touz que j'ay pris et prem en fié lige et en chasemant de ma noble dame Lore en accressance dou fié que devant tenoie de li cent soudées de terre à estevenans lesquex je li hai assignées et assises c'est assavoir sur le meis Wauchier à Mochaut à Deserviler lequel meis je li hai assis pour dous meis et ouquel meys il y a cinc hommes qui tient douze jornax de terre arauble en fin et les prez à cinc charrées de fayn et pour amender ces choses dessusdites le prey Faucognier où l'on fait bien trois charrées de fayn et ont cest dui meis chasaut et cheneviere après sus le meys à Goygeul à Deserviler et le prez à dues charrues de fain et dous chesaus et doues chenevieres après sus la quarte partie de l'un des quartiers de la forest de Mance et la moie partie des corvées des charrues ce est assavoir VI charrues chascun an et la moie partie des fromaiges des fructeries et quanque je hai ne doi avoir à Deserviler es justises et en toutes autres choses Et toutes ces choses dessusdites promet je per ma foy donée corporel[mant] à ma devantdite dame garantir deffendre et appaisier contre toutes genz et en touz leus et que encontre ne venray par moi ne par autrui dois ores en avant ne consentirai que autres hi viegne renunçant En tesmoignaige de ceste chose j'ai requis et fait metre en ces presantes lettres le seal de Saint Anathoile de Salins Ce fut fait le mardi après feste Touz Sainz l'an Nostre Signour mil douz cenz et septante et trois