Charter Document - 02220214

Je Estevenins de Levier diz Puz escuiers fais savoir à touz que je suis hons liges devant touz à la noble dame Lore contesse de Bourgoigne et dame de Salins et tien de li en fié Girar le fil Estevenim d'Outre Jou et son mès ouquel mas ha VIII septures de prez et siet ou chemin d'Usies delez le prez à Lombar et delez celui prey ha un jornax de terre et V septures d'autre prey as assars de Cendon de celui mès meisme et le chesaul devant chiés Girar le Loschar où sa maison siet Paris la Chace et son mès où il a cinc septures de prey ou sentier d'Usies delez le prey Gamari et un chesaul delez chiés Girar le Clerc Jaquet le fil Estevenim au fil Brumetain et son més où il a cinc septures de prey en l'assar Rufin et en la combe Funa doues septures de prey et en Tendons doues septures et demie de prey et la douzainne dou four de Quarruge et son chessaul où sa maison siet et doux journaul de terre en la teroie les dous anfans Garnier lez le prey à maiour de Boisecon Malvoisin le fil Brumeteain et son mès où il ha cinc septures de pré en la Coste lez le pré Galabrier et doues septures et demie de prey en la combe Funa et le dozanna dou fourc à Quarruge et le chesal delez chiés Paris le fil Ciquadam et doux jornal de terre en la Retorbe et tien encour de li le pré de la Meserance qui est de ma demenure où il ha fait septures Et pour ledit homaige que je hai fait à ladite contesse pour quoi je li ai assise ces choses dessus nommées ale m'a donné XX livres d'estevenans lesquex je hay hau et receu de li en bons deniers nombrez et desquex je me tieng pour bien paiez En tesmoignaige de laquel chose à ma priere et à ma requeste li religious hons et honestes Valchier abbes de Goiles et li chapitre de Saint Anathoile de Salins ont mis lour seaux pendans en ces presantes lettres Ce fut fait ou mois de janvier l'an de l'incarnation Nostre Signour qui corroit par mil et doux cenz et sexante et siex