Charter Document - 02220213

Charter Document - 02220213


Charter Number: 02220213
Cartulary Title: Cartulaire de Hugues de Chalon (1220-1319)
Charter Language: French
Charter Origin: Lay
Charter Type(s): Recognition
Date: 1288
Date type: Internal, A.D., Feast
Resource Link(s): Patrimoine numérisé de Besançon - MS Droz 21 - Tome 1 (p448)

Charter:

Je Jaquet de Charrins damoisiaux fais savoir à touz que cum je soie hons à noble baron Jeham de Chalon signour d'Arlay et je tieng de luy en fié et en chasemant tout ce que je tiegne à Arlay en ma demanuire en champs em prez en vignes en homes en censes et en toutes autres choses et les fiez et les chasemanz que Girars mes oncles chenoines de Besençon et li anfanz mons Pierre de Charin çay en arriers mon oncle et messires Guis [de] Chielye chevaliers messires Renaz Merles chevaliers et messires Hugues dit de Larive chevaliers tienent de moy [à] Arlay dessusdit que je non pas contreinz ne deceuz mas pour mon evidant profit et par le lox et par le consentemant de Jeham Estevenim et Valchier mes amez freres hay repris et repren en fié et en chasemant de Jeham dessusdit mon amé signour en accressemant dou fié dessusdit tout ce que je hay et tieng à Lombars et à Requanour au jor que ces lettres furent faites et données ce est assavoir en champs em prez em bois en homes en censes et en toutes autres choses et ce que messires Haymes mes oncles moinnes de Baume tient de moy à Bere et à Monfoutier Lesquex choses dessusdites je Jaquet dessusdiz hay promis et promet par mon soiremant donné sus sainz ewangiles de Deu corporelmant garder requenostre et tenir fermemant audit Jeham mon amé signour dessusdit et es suens [et que] ne venrai encontre cest fait ne feray ne consentiray autrui personne pour moi et pour les muens venir encontre taisiblemant ne aparrammant En tesmoignaige des choses dessus dites et nommées nos Jaquet Jehans Estevenins et Valchier frere dessusdiz havons fait metre en ces presantes lettres les saelz pendanz es saiges persones et discretes Guillaume diens de Lons et Pierre priour de ce meisme leu lesquex nous tenons por persones au[ten]tiques Ce fut fait et doné le sambadi devant feste saint Jeham Baptiste en l'an Nostre Signor corrant par mil douz cenz hoctante et VIII ou mois de jung