Charter Document - 02220204

Sachent tuit cilz qui verront et orront ces presantes lettres que dame Aelis fille çay en arriers Perrenat de Monjoy damoisel de la velonté et dou consentemant mons Henri de Chemins chevaliers son mari et lidiz messires Henri de sa propre velonté por servises courtoisies consoil et haides que nobles hons Jehans de Chalon sire d'Arlay lor a fait et pour ce que lidiz Jehans s'est consentus à la vendue que lidiz messires Henris et sa fome dame Aelix fait à Symon de Vaudrey damoisel de la moitié dou bourc de Monjay et des apartenances liquex moitié doudit bourc estoit dou fié audit mons Jeham ensi come lidiz Henris et Alix sa fome l'ont cogneu et meismemant pour quarante livres d'estevenans que je lidiz Jehans lour ay doné et lesquex il ont ahues et receues doudit Jeham en bons deniers nombrez et s'an sont tenus pour bien paiez ilz en recompensation des servises courtoisies consoil et aides dou consentemant de ladite vendue et desdites XL livres ont donné quité et outroié donent quitent et outroient audit mons Jeham et es suens permaignablemant tout le fié droit action usaige reclamation proprieté et possession que lidiz Henris et sa fome ont puent et doivent avoir en quelque meniere que ceu fut es choses que Guillaumes dit Moutons dou Saçoy damoisel tient et tenoit ou devoit tenir de lour doux emsamble ou de chascun de lour par soy en fié et en chasemant en l'ile qui siet en la riviere de Brainne entre la maison que l'on appelle Alnarde d'une part et la vile dou Genetois d'autre part et d'autre costé devers le biez qui saut de l'estant de Monjay et en toutes les appendisses et appartenances doudit leu c'est assavoir en hommes en eaux en pescheries en rentes en signories en champs em bois en meis en fiez en justices grant et petites en prez em bois et en toutes autres choses quele qu'eles soient que appartienent et puent et doivent appartenir audit fié de l'ile Et se sont devesti lidiz Henris et sa fame des devantdites choses pour la cause devantdite et ledit mons Jeham en ont envesti et mis en possession corporel ou ansi Encour est assavoir que li devantdiz Henriz et Aulix sa fame ont cognu que li fiez lequel Terterins de La Charmete tient de lour est dou fié doudit mons Jeham [et] toute la partie que il ont puent et doivent avoir ou bois de Banc et es appendisses doudit bois qui part à Symon de Vaudrey liquex bois siet ou territoire de Monjay Et est assavoir que ladite Alix a fait le don et la quittance dessusdite come cele qui est bien assignée en autres leus soffisanz de part le devantdit Henri son mari de son mariaige et de son douaire Et toutes [ces] choses dessusdites ensi con eles sont dessus devisées ont promis et prometent lidiz Henris et sa fame par lour soirement doné sus saint ewangile tenir et garder fermement pour lour et pour lour hoirs et que il ne venront encontre par lour ne par autrui ne consentiront autre qui vigne en jugement ou deffiers jugement taisiblement ou expressement et ont renuncey Et ont voulu et outroié lidiz Henriz et sa fame que se il venoient encontre lesdites choses ou encontre aucunes d'iceles que li officials de la court de Besençon les controigne par sentence d'escumeniement et se sont submis et submetent lour et lour hoirs quant es choses dessusdites tenir et garder à la jurisdiction de la court de Besençon En tesmoignaige de laquel chose nous li devantdiz Alix et Henri avons requis honorauble baron et discreit l'official de la court de Besançon que il mete le seel de ladite court en ces presantes lettres Faites et données le lundi devant la feste des apostres Symon et Jude l'an Nostre Signour corrant par MCC quatre vint et dix