Charter Document - 02220202

Je Hugues de Fertens chevaliers fais savoir à touz que cum li nobles bers Jehans çay en arriers cuens de Bourgoigne et sires de Salins ahust doné à Mayhu de Vinceles clers à sa vie tant seulemant dix livrées de terre en sa rente dou puis de Salins à paier chascun an à la purification Nostre Dame et lidiz Mayhuz hait doné à Hysabiau sa serour ma fame lesdites dix livrées de terre et li noble bers Jehans de Chalon sires d'Arlay hait doné et outroié à ladite Ysabiau ma fame à heritaige ceu que à lui afiert desdites dix livrées de terre je promet en bone foy audit Jeham de Chalon signour d'Allay que se ainsi estoit que je vousisse faire fié de ceu que à luy affiert desdites X livrées de terre que je n'am faroie point se à lui non se n'estoit par son grey En tesmoignaige de ceste chose por ce que je n'ay seel je hay seelé ces lettres dou seal à la noble dame Ysabiau dame de Mirebel serour doudit Jeham Ce fut fait le juedi après la nativité Nostre Signour l'an Nostre Signor mil CC septante et VII