Charter Document - 02220198

Je Guillaumes de Sainte Croiz sires de Longuepierre et Guillemete fille de çay en arriers mons Valchier de Commercey signour de Monrivel et fome doudit Guillaume façons savoir à touz que nouz nom mie par force par paour ne pour barat ne pour autrui circumvenir mais de nostre bone volonté recognossons em pure verité que nous tenons nostre chastel de Monrivel les appendisses et les appartenances doudit chastel en fié lige de nostre amé signour Jeham de Chalon signour d'Allay jurable et rendable toutes les foiz qu'il an aura mestier et que nous am sarons requis de lui ou de son certain comandemant En tesmoignaige de laquel chose nous avons mis nos seaux en ces presantes lettres et havons prié et requis discrete persone l'offeciaul de la court de Chalon que il le seaul de ladite court mete en ces lettres ensamble mon seaul devantdit Et si havons ausi requis maistre Pierre de Mombeliart publique notaire que il mete en ces presantes lettres son soing acostumé ensamble nous seaus et le seaul de la court de Chalon devantdit en tesmoignaige des choses dessusdites Et nous Jeham de Ostun officiaux de la court de Chalon Ce fut fait et doné en la presance de mons Jeham de Ostun officiaul de Chalon devantdit Hugue son cler Jaquet Poli de Bleterens et maistre Marche de Marvans clerc tesmoing à ce especialmant apelez l'an mil CCC et sept Et ego Petrus []