Charter Document - 02220191

Je Willemins Morraille d'Arguel fiz mons Perron d'Arguel çay en arriers fais savoir à touz que je suis devenuz hons dou noble baron mon amé signour monsignour Jeham de Chalon signour d'Arlay pour les granz biens et les grantz courtoisies que il m'a fait et ay repris et repren de luy à toutjour mais cent soudées de terre de mon propre alluef en accroissemant de son fié lesquex cent soudées de terre j'ay promis et promet par mon soiremant doné asseoir oudit monsignour Jeham par stipulation sollempne et par mon soiremant jai doné paier et rendre audit mons Jeham ou à son comandemant qui ces lettres auroit cent livres d'estevenans au non de painne à sa requeste ou de son certain comandemant dois ledit terme en avant à ladite some levée ou non levée [et] wel je estre tenus et suis tenus asseoir lesdites cent soudées de terre au regart de proudomes ainsi comme dessus est devisez Et pour plus grant seurté faire de ce j'ay mis plage en la main doudit mons Jeham Jeham mon frere signour de Charencey de cinquante livres Et je lidiz Jehans de Charencey à la requeste doudit Willemin mon frere me suis establiz plaige en la main doudit mons Jeham de Chalon signour d'Arlay et hai promis audit mons Jeham par stipulacion sollempnel et par mon soiremant doné se lidiz Willermins d'Arguel mes freres ne asseoit audit mons Jeham lesdites cent soudées de terre ainsi comme dessus est diz dedanz lesdix siex ans ou ledit terme passé ne li paiat lesdites cinquante livres d'estevenans [lui paieroie] ou delivreroie gaiges menaubles ou pourtaubles en lue sur desquex on porroit avoir lesdites cinquantes livres Et ces covenances dessusdites je lidiz Willermins d'Arguel et je lidiz Jehans de Charencey avons promis et prometons par nostre soiremant jai doné tenir et garder sanz corrumpre et à ceu obligons nous nous et nouz biens muables et non muables où que il soient ne porroient estre trovez En tesmoignaige de laquel chose nous avons mis nostre seal pendant en ces lettres faites et données l'an mil CC et nonante ou mois d'avril