Charter Document - 02220190

Je Jehans de Chaffoy chevaliers filz çay en arriers mons Gui de ce meisme leu fais savoir à touz que com très noble bers mes très chiers sires messires Jehans de Chalon sires d'Arlay m'ait doné X livres de rente [à] moi et mes hoir permaignablemant à recevoir en sa rente dou pois de Salins le jour de l'assumption Nostre Dame ou mois d'aost et m'ait doné un chevaul du pris de quarante livres de tournois lesquex j'ai receu de luy je ces choses hay receu doudit mon très chier signour en la forme et en la meniere ci dessoz escripte c'est assavoir que je et mi hoir devons tenir ledit chevaul et hernois pour servir ledit mon chier signour quant mestier an aura contre toutes genz [lui] et ses hoirs et diz livres de rente j'ai pour tenir ledit cheval et ledit hernois et pour acheter mes robes pour moi vestir Et se estoit que lidiz chevaux fut perduz ou servise mondit signour ou de ses hoirs il le me doit rendre ou à mes hoirs tantque à la valour desdites quarante livres Et hai repris doudit mon chier signour cent soudées de terre c'est assavoir le pré de la Quengerienne liquex siet riere Chaffoy et Bannes [l]esqueles cent soudées de terres auvec les dix livres dessusdites lidiz messires Jeham ou sui hoir poent assigner et prendre et tenir sa ceu estoit laquel chose ne soit deffaillissent à tenir ledit chevaul et ledit hernois et quant aucuns hoirs venroit qui porroit ledit chevaul tenir em piés pour faire le servise lidiz messires Jehans li doit rendre lesdites cent soudées de terre et les dix livres de rente ensi come il est dessus devisez Et ce je promet par mon soiremant doné sus saint ewangile tenir et garder em bone foy pour moy et pour mes hoirs En tesmoignaige de ces choses j'ai requis le chapitre de Saint Anathoile de Salins que il metent lour seaux en ces lettres auvec le mien seal en tesmoignaige de verité Faites et données l'an Nostre Signour corrant par mil CC octante et nuef ou mois de decembre