Charter Document - 02220189

Je Huguenins de Joudes escuiers filz çay en arriers mons Guion de Joudes fais savoir à touz que je suis hons de main et de bouche à très noble baron mon amé signor Jeham de Chalon signour d'Arlay et hai repris de lui en fié permaignablemant à tenir de luy et de ses hoirs ceu que je hai et puis et doy avoir en la vile et es appartenances de Mastrignye lesquex choses sunt de mon propre alluef c'est assavoir Bonet de Mastrignye et sum mès Guienet de Mastrignie et sum mès Pierre de Mastrignie et sum meis Perret de Mestrignie et sum meys lesquex choses et lesquex meis emsamble les appendisses c'est assavoir en champs em prez en aigues em bois en justices en signories en terres araubles et non araubles je et mi hoir tieng et doy tenir en fié de mon devantdit signour et de ses hoirs permaignablemant emsamble les usaiges que je et my hoir et my home de Mastrigney avons et devons avoir ou bois d'Arnoy et ou quart de l'estant de Mastrigney et es sieges dou molin et dou batour qui siet sour la chaucie doudit estant Et est assavoir quem es devanzdiz amez sires ha donné à moy et à mes hoirs permaignablement em fié et en chasemant VIII livres d'estevenans ou de menoie corrant en la cyté et en la dyocese de Besançon en la valour que li estevenans sont quant ces lettres furent faites em bons deniers nombrez de rente [à recevoir] chascun an le jour de l'assumption Nostre Dame qui est ou mois d'aost en sa rente dou pois de la saunerie de Salins et m'a donné un cheval de la valour de quarante livres de la menoie dessusdite lequel je hai au et receu de lui et m'an tien pour bien paiez Et ces choses j'ay receu de luy en la forme desouz escripte et devisée pour moy et pour mes hoirs c'est assavoir que je et mi hoir devons tenir permaignablemant ledit chevaul et hernois de gentilhomme pour servir le devantdit mon amé signour et ses hoirs toutes les foies que il requerront moi et mes hoirs contre toutes genz sanz meffaire Et se ainsi estoit que il convennist moy ou mes hoirs servir aucun de mes signours que je porroie et davroie servir sanz meffaire contre ledit mons Jeham [je promet par mon soiremant doné sus saint ewangile que je le chevaul et le hernois de quoi je doi et suis tenuz ledit mons Jeham] et ses hoirs servir ne menrai ne ferai mener en son nuisemant se ce n'estoit par sa velonté Et cesdites huit livrées de terre je et mi hoir hai pour tenir ledit cheval et le hernois em pié pour servir mon amé signour devantdit et ses hoirs com il est dessus devisez Et se ainsi avenoit que je perdisse ledit chevaul ou servise de mondit signour ou de ses hoirs il sunt tenus à moy et à mes hoirs de rendre lidit chevaul jusque à la valour de quarante livres ou de plus se plus valoit lidiz chevaus de la menoie dessusdite Et est assavoir que se je ou mi hoir ne poons ou ne volons tenir em piez ledit chevaul et ledit hernois mes devantdiz amez sires ou sui hoirs poent de lour propre auctorité comme sires dou fié les choses dessusdites lesquex je hai repris doudit mons Jeham emsamble lesdites VIII livrées de terre prendre sanz nous apeler à jugemant et tenir jusque à ce que je ou mi hoir poissent et vousissenz tenir em piez ledit chevaul et hernois pour lour servir et sitost com je ou mi hoir voudrons et porrons tenir em piez ledit chevaul et hernois je ou mi hoir devons avoir les rentes dessusdites sanz nul contredit par ensi com il est dessus devisez Et ceu promet je pour moi et pour mes hoirs par ma bone foi donée corporelmant sus saint ewangile et par sollempne stipulation à tenir et à garder pour moi et pour mes hoirs bien et loialmant sanz nule fraude permaignablemant Et est assavoir que se chevaliers devenoie mes devantdiz amez sires ou si hoir doivent mesdites VIII livrées de rente de la menoie dessusdite acroistre de quarante souz de rente de la menoie dessusdite et doner lettres l'une partie à l'autre de ces convenances En tesmoignaige de laquel chose je prie et requier discrez religious et honestes homes Hugue abbés dou Mirour de l'ordre de Citiaux et Guillaume priour de Gynie de l'ordre de Cliney qu'il metent lour seaux en ces presantes lettres Données en l'an de grace mil doux cens LXXXX ou mois d'aost